影片
更多
2023-11-20
368 瀏覽
尋日朝早9點幾，諗住搵間餐廳坐到11點接放學，就去咗長沙灣御匯嘅「點小館」飲茶。兩個人叫咗3份點心孖寶，然後開住個平板睇吓戲（冇播音，用藍芽）。可能我哋兩個食得太快，食完就齋嘆茶睇戲，唔知係咪因為咁樣就引起餐廳呀姐不滿，到坐咗1個鐘左右，突然有位呀姐通知我哋「呢度限時90分鐘，夠鐘就要走架啦」咁話。佢當時說話非常直接，係無端端路過話你兩句就走開嗰隻，感覺係唔友善嘅。我哋當時才知道呢間餐廳有限時（但當時都未夠90分鐘），加上原先打算10：55都走，就繼續坐啦。過咗一陣，另一位呀姐二話不說埋嚟收走我哋嘅碗，剩低兩杯茶喺枱。10：51分，第3位呀姐直接行埋嚟收埋我哋嘅茶杯，佢話已經夠鐘，叫我哋走，我哋問邊度寫住90分鐘，佢話門口寫住架，仲話門口好多人等。呀姐已行開咗，仲離遠大叫告知我哋：「你哋9點21分入座架，睇清楚吖！」我當時感覺係被人趕走，唔好講顧唔顧客，直頭覺得點解可以咁樣同人講嘢，我哋得罪咗你？一夠鐘就好似終於可以過嚟撩交嗌咁。於是我哋埋單同收銀講呢個情況，呢個時候，剛才收杯嘅呀姐就話「我哋已經提過你架啦，夠鐘我哋就會收嘢架喇！」我哋話都唔駛態度咁差，個收銀就9唔搭8咁話：「我哋啲客
兩個人叫咗3份點心孖寶，然後開住個平板睇吓戲（冇播音，用藍芽）。可能我哋兩個食得太快，食完就齋嘆茶睇戲，唔知係咪因為咁樣就引起餐廳呀姐不滿，到坐咗1個鐘左右，突然有位呀姐通知我哋「呢度限時90分鐘，夠鐘就要走架啦」咁話。佢當時說話非常直接，係無端端路過話你兩句就走開嗰隻，感覺係唔友善嘅。
我哋當時才知道呢間餐廳有限時（但當時都未夠90分鐘），加上原先打算10：55都走，就繼續坐啦。過咗一陣，另一位呀姐二話不說埋嚟收走我哋嘅碗，剩低兩杯茶喺枱。10：51分，第3位呀姐直接行埋嚟收埋我哋嘅茶杯，佢話已經夠鐘，叫我哋走，我哋問邊度寫住90分鐘，佢話門口寫住架，仲話門口好多人等。呀姐已行開咗，仲離遠大叫告知我哋：「你哋9點21分入座架，睇清楚吖！」我當時感覺係被人趕走，唔好講顧唔顧客，直頭覺得點解可以咁樣同人講嘢，我哋得罪咗你？一夠鐘就好似終於可以過嚟撩交嗌咁。
於是我哋埋單同收銀講呢個情況，呢個時候，剛才收杯嘅呀姐就話「我哋已經提過你架啦，夠鐘我哋就會收嘢架喇！」我哋話都唔駛態度咁差，個收銀就9唔搭8咁話：「我哋啲客唔會咁！」
當然其實講多無謂，直接問呀姐點稱呼，我會向公司反映意見，呀姐就就話：「我姓x，你投訴啦，知我邊個架啦！」我亦回應：「好，我一定會。」然後出門一刻，店裏面嘅另一位員工仲講：「快啲走𠻹呀！」此刻我感覺成間店嘅師奶員工好團結，亦好小家。
而我哋出到門口，其實門口係冇人排緊隊。講真，一般餐廳冇人客等緊都唔會咁計較比人坐多陣，但呢間餐廳嘅呀姐似係撩交嗌多啲。
當我哋湊完放學，再經過餐廳門口，想搵吓佢所講嘅限時90分到底寫喺邊，入座又唔講！哦，原來寫住繁忙時間入座時間為90分鐘，至於咩係繁忙時間就冇寫，只寫住早茶、午巿及晚巿時段。喺我哋睇緊門口期間，入面嘅呀姐又向門口大串：「慢慢欣賞啦！」
呢種人真係同佢講都浪費時間，一把年紀仲講嘢鬥氣咁幼稚，身為餐廳員工都唔收吓把口。
張貼