Green Orange

難得呢日喺上環做嘢，所以就 book 好位，約埋好友一齊食個 dinner 先。餐廳夜晚燈光暗暗哋，好柔和，加埋蠟燭就好有情調; 睇完餐牌後，同朋友決定 share 食物，咁就可以一齊試多幾款啦!餐包 - 質地鬆軟，甜甜哋，點埋油醋汁好好味。蟹肉南瓜忌廉湯 - 南瓜味好濃好滑，裡加咗好多蟹肉，一路飲湯都食到呀，唔錯。燒帶子柚子沙律 - 帶子煎得剛剛好，有鮮味得嚟又唔會韌，西柚好甜又多汁，加埋沙律菜，好 refreshing! 香煎鵝肝伴黑松露雜菌意大利飯 - 鵝肝外皮煎得香脆，內裡就軟滑甘香，意大利飯煮得剛剛好，加咗雜菌碎，增加咬口，亦可能因為咁樣，呢個飯好清爽，完全唔會覺得膩。脆焗豬手伴蜜糖芥末汁 - 侍應會拎隻豬手問要唔要幫手切，我哋就緊係要啦! 豬手外皮鬆脆，豬肉腌得鹹香入味，肉質又唔會好嚡，點埋蜜糖芥末汁，食落無咁膩同乾之餘，又帶出另一種香味，好惹味呀! 伴碟用上甜薯，好 match! 朱古力布朗尼伴雲呢拿雪糕 - 布朗尼熱熱哋，配埋質感綿密幼滑嘅雲呢拿雪糕，一冷一熱，正! 餐廳整體食物水準高，侍應細心有禮貌，雖然係樓上鋪，但都唔會好嘈，傾計都 ok。