牛惣居酎屋

營業中

休息中

今日同朋友2人短暫飯聚，搵到呢間串燒居酒屋，午市定食其實都好吸引抵食，但又想食好少少，叫左2人串燒餐，可以試多幾款食物款式。鋪仔細細但座位闊落，枱數唔多，唔怕人流太多的風險。刺身有三文魚，油甘魚同牡丹蝦，整體都好新鮮，蝦肉係透光玻璃色，鮮甜彈牙，油甘魚油脂香味好濃，齒頰留香。自家制豆腐好大份，外皮燒得香脆，內裡保留到幼滑質感，比普通燒豆卜的確更勝一籌。巨峰梳打同青檸梳打，味道清爽，同串燒好夾。燒雞翼燒得好好，皮夠脆，醃製味道剛剛好，有肉汁。蘆筍豚肉卷燒得好香，蘆筍夠嫩無筋，而且juicy, 有豚脂香味，味道更加有層次。主角橫格肌燒好有創意心思，右一黑芝麻醬，右二蜜糖，左一香蔥蒜蓉，左二山葵洋蔥，我覺得最特出係黑芝麻醬，同牛肉出奇咁夾，比白芝麻更香濃，牛肉肉質好嫩又多汁，係高水準牛肉之作。最後熱烏冬亦彈牙暖胃。服務周到，價錢相宜，係想靜靜地嘆清酒串燒嘅好地方。