心之食堂 (裝修中)

今日夜晚放工，約朋友行咗陣銅鑼灣，行到咁上去，想搵啲好嘢食，咁岩見到心之食堂，咁就試下啦，估唔到有意外驚喜。一入到去，食堂雖然細細間，但裝修環境別有格調，播住一啲輕快嘅音樂，令人放鬆。食物方面，先講講京蔥雞肉串，一共有2串，岩岩好同朋友可以一人一串，肉質鮮嫩，燒得岩岩好，再配上獨家醬汁，味道一流，值得推薦。和風番茄沙律，沙律非常新鮮，甜甜既蕃茄加上酸酸既汁，非常令人開胃同滿足。燒雞軟骨，總共有3串，非常脆口，加上外表上既鹽粒，簡直絕配。日式煎餃子，炸得金黃鬆脆，我估呢個就係人們所謂既外脆內暖，煎餃子最高既境界啦，加上獨門醬汁，真係絕配到爆。蒜片牛柳粒，炒得非常入味，中意食牛既朋友絕對唔可以錯過。咖喱薯餅，採取吉列嘅形式，外層炸得金黃，入面包住暖暖既咖喱，配搭新鮮又合襯，可以一試。果汁特飲，味道類似雜果賓治，但甜度適中，帶有氣泡，應該個個人都會中意飲。