Green Orange

今日去咗上環嘅 Green Orange 食晚餐，因為係樓上餐廳嘅關係，環境都幾清幽。食嘢之前叫咗兩杯嘢飲，我個杯Sin City係威士忌同咖啡嘅Cocktail，一睇落去仲以為係咖啡，飲落去咖啡味濃，第一啖有啲似 cold brew，之後會滲出淡淡嘅威士忌味，因為用咗Laphroaig Whisky，有相對地重嘅泥煤味，令到味道層次非常特別，鍾意威士忌嘅朋友值得一試。朋友就叫咗杯Ba-La-Bloom，味道偏甜，聞落去好香玫瑰味。前菜我哋叫咗忌廉白酒煮青口，青口鮮甜，配合淡淡嘅忌廉汁，非常適合傾住計食。我哋仲叫咗燒北海道帶子藜麥沙律伴柚子橙香醋汁，顏色鮮豔，望落去非常吸引，而且好香煎帶子味，配合生果同埋沙律，食落既開胃又健康。主菜有西班牙紅蝦海鮮濃汁闊條麵，西班牙紅蝦之外有青口、帶子等海鮮，材料豐富，而且有蘑菇、蘿蔔同蕃茄做配菜，煮得入味得來又有鮮味。再嚟係燒西班牙黑毛豬架，油脂分佈均勻，而且肥瘦適中，令到豬架嘅口感有啲似豬頸肉，油份充足又有焦香味。最後係火焰香蕉雪糕做甜品，上菜嘅時候侍應會加上火酒令到成個甜品着晒火，非常霸氣。燒完之後仲會有少少餘溫，同雪糕形成強烈對比。