米走雞Deluxe (已搬遷) 新店位置

米走雞米走雞，一直都覺得佢好似一個口號咁! 好似我哋平時咁講唔好走寶呀!今日終於可以見識到個寶喺邊， 原來呢一間米走雞係一間雞煲嘅專門店， 嚟米走雞唔食雞煲真係會走寶呀!所以我就揀咗個火焰麻辣雞煲，小辣。 不得不讚呢個火焰雞煲，火焰唔係為咗增加嗰個效果，氣氛，而係將嗰啲雞嘅鮮味揮發出嚟， 好聰明嘅做法。 件件都係啖啖雞脾肉， 肉質唔韌。 白鱔片新鮮，唔會有太多骨。嗌咗啲吸味嘅油麥菜，新鮮爽脆。 仲有健脾嘅山藥， 一睇佢雪白無比就知喺製作過程中用咗方法保持佢嘅新鮮度。 口感係我最想食到嘅少許粉嘅狀態。仲揀咗幾塊寶㖭。由上而下 手打鮮蝦丸食到有原隻蝦， 手打鮮牛丸， 瑤柱鯪魚滑用陳皮提升鯪魚香味， 手打豬肉丸， 手打鮮墨丸有墨魚肉。 粒粒都大大粒，彈牙爽口，材料豐富。 呢個係一個可以拉到絲嘅芝士春卷， 而且又夠熱又脆。加一杯透心涼咸檸7，半個咸檸已香味十足。