餃掂手工餃子雲吞專門店 (已結業)

近排天氣反反覆覆，搞到都有啲作感冒。所以去左太子嗰頭揾睇開嘅中醫師傅執下幾劑感冒茶飲下。行經界限街見到餃掂招牌寫住「天下第一餃」咁巴閉，就入去會一會佢有幾巴閉。柯打左招牌至尊松茸豬肉餃，同埋黑白松露鴛鴦煎餃。跟餃子會有碗狀元湯，味道飲湯似花生眉豆雞腳混合粉葛鯪魚湯咁，有啲清甜同輕微中藥味，味道都唔錯。黃金皮蛋。味道幾香雖然流心程度唔係好犀利，但配上腌蘿蔔一齊食就好夾，去除晒皮蛋嘅鐵鏽味。軟軟腍腍咁，唔錯。黑白松露餃(8隻)，黑松露及白松露各佔一半。豬肉餡幾結實，其實味道同香味就無咩分別，係個內餡顏色上係一黑一白。兩款都唔使點醬油／其他調味就夠味了。松茸餃味道比黑白松露餃味道為淡，但口感好好多為係會食到一粒粒嘅松茸係入面。味道係淡淡嘅清香，無松露咁濃烈。最啱係點啲辣椒醬黎食。不得不提係呢度嘅自家製腌酸菜蘿蔔，味道酸得黎唔嗆，酸甜度做得幾好對於餃子呢類易滯嘅食物黎講，好消滯同清味蕾。不過啲辣椒就咁食就太勁了食左一塊已經夠了。雖然係餃子掂，但內籠裝修都好企理，又有唔同嘅食材養生資訊，都係幾唔錯嘅一間餃子店。