幸福川226

營業中

休息中

要去觀塘見客，諗住喺附近搵定位。商場又冇位，美心集團啲餐廳仲要90分鐘起身！一早都聽過大部份呢區餐廳都係啲工廈入邊，一般都好嘈，之前我試過同個客好似要鬧交咁，都傾唔到偈，想搵間四正見客嘅其實都幾難… 睇評語見呢間餐廳好多嘢揀，居然午餐有火鍋！好吸引，但係呢期好多人病都係清清哋好，餐廳職員話有自家製湯飯，無味精，咁我就嗌咗個湯飯，叫醉藥雞黨。一入口好驚豔！湯底清新帶輕甜，撈上嚟有圓肉同杞子，雞醃得好入味，係花雕酒味！細個阿嫲煮麵會落花雕，好有feel，一入口就認到！我個客鍾意食牛所以嗌咗個牛魔王，有牛肚牛筋牛柏葉仲有好多牛嘢，佢話好味好抵食！我哋每set仲有跟油菜甜品水果嘢飲，有油菜真心好開心，而家好少喺出邊食到菜！成set 咁多嘢，食到飽！呢度環境都唔錯，寬敞得嚟又乾淨，可能地方大，坐滿人都唔嘈，最正係同個客傾得好開心！呢度D客都幾斯文，仲有D靚仔恤衫客。職員話呢度夜晚仲有火鍋放題，搵機會會同男友再嚟。不過呢度有啲難搵，喺棟高級商廈嘅六樓，初初喺樓下㩒𨋢都有啲猶豫，好彩上咗嚟，真心值得試！