阿爺八鮮鍋 (已結業)

突然間想打邊爐，搵到阿爺八鮮鍋有兩小時海鮮放題火鍋，個套餐仲包咗雞燉翅湯、刺身拼盤、花膠雞煲、海鮮拼盤，同埋任選火鍋配料，加多$20仲可以任飲飲品！餐廳細細地，坐得比較密，雞翅燉湯上枱嘅時候仲用火暖住，味道好清甜好足料，仲有好大塊翅。個刺身拼盤牡丹蝦好大隻，油甘魚好清甜，個魷魚好爽口，我好鍾意食。我哋另外叫多咗個立魚象拔蚌刺身拼盤，勁推介，象拔蚌好甜好爽口，立魚切得好薄，好欣賞師傅嘅刀工！個花膠雞煲好入味，啲花膠份量好多，好爽唔會太冧，好有口感！我最欣賞係海鮮拼盤中嘅龍蝦煮咗5分鐘啲肉質都非常滑同香甜，唔韌，個蟹有好多膏，好鮮甜，個鮑魚同帶子都唔錯好爽。餐廳仲有一個$10嘅扭蛋機，如果like咗佢社交平台仲可以免費送一次扭蛋，我哋扭到個吞拿魚入口即溶紫菜。