金麥泰泰國菜館

營業中

休息中

出左九龍城買嘢就當然夾好時間約老公食個午餐，嚟得就當然係食正宗老字號嘅泰國菜啦！先嚟一碟 泰式柚子沙律 為前菜，份量都好多嘅大大粒清甜柚子肉，拌上泰式酸辣汁，再加埋面頭嘅脆脆花生，口感非常清新醒胃。之後就到食泰國菜必點既泰式無骨鳳爪，鳳爪口感爽脆之餘，加埋洋蔥、芫茜、唐芹等配料一齊食，口感已經唔錯，再加埋酸辣醬汁，真係會一隻接一隻咁食呀。再嚟一個 冬陰功湯，湯底味道夠酸而偏甜，當中又帶有少少辣，而湯中仲加入了蝦、洋蔥、菇類同埋檸檬葉等，令個湯可以有更多嘅層次感同風味。泰式串燒豬肉牛肉都唔錯，外面焦香脆脆內嫩嘅串燒，肉質都非常軟嫩juicy，仲醃得好夠味。再蘸埋個秘製辣汁，個味道就更加惹味呀。之後來一個 泰式鳳翼釀珍珠，雞翼外皮炸得好香脆，係無骨雞翼入面釀咗糯米，當中又帶少少臘腸同肉碎，煙煙韌韌糯米加上少少嘅飯焦，口感非常豐富。最後就嚟兩杯特飲，青檸梳打同芒果沙冰，不得不讚杯芒果沙冰，沙冰細滑冇冰粒，最好就係勁香濃芒果，完全係新鮮芒果製嘅新鮮感，絕對唔係芒果糖漿嗰啲，勁鐘意呀！