極尚大喜屋 (加連威老道) (已結業)

Item: 極尚大喜屋 (加連威老道)
Rating: 4
Author: 奧志雷

Deluxe Daikiya Japanese Restaurant (Granville Road)

786 食評

味道

環境

服務

衛生

抵食

82168

尖沙咀

$201-400

日本菜任食/放題

555

奧志雷

等級4

難得約到成打朋友齊齊開心聚聚餐，一定要食盡去 ﹗朋友仔大力推介此放題餐廳，一向討厭任飲任食、放題自助餐既我都被打動了，試就試啦。放題每晚只做兩輪，因為大家放工都較夜，唯有食尾圍啦。準時到達，真係唔講以為有米派囉，原來訂左檯都要排隊等，因為上一圍未散席啊。

等了又等，終於可以上樓喇 ﹗群情洶湧，大家都等得不耐煩又肚餓呢，八點半喇 ﹗餓鬼群出沒注意。我地這一班坐到最最最入面長檯先夠坐呢，立即快快望一望 menu 就落單，唔係有排等啊 ﹗侍應哥哥、姐姐、弟弟、妹妹都熱情繽放、主動有禮，仲會答答訕、說說笑，服務比我想像中好好多，因為以前有過不開心經驗囉。

劍魚腩、三文魚、油甘魚，色澤油潤吸引，入口清涼宜人，沾點芥辣豉油，好鮮甜肥美啊 ﹗意料之外的高質，油脂豐富，餘香處處，好味道。北寄貝，軟腍質地，螺味鮮甜濃郁。甜蝦，黏黏滑滑彈彈，無可抗拒既新鮮度，甜美非常。鱆紅魚，結實彈牙有咬口，淡淡魚鮮味。墨魚，黏黏滑滑又嚥韌，墨魚味濃厚。吞拿魚，赤肉味道都不錯，清爽魚味可口。

黑松露油甘魚壽司，肥美嫩滑油甘魚添上黑松露獨特既幽香，不要太多，蜻蜓點水般最恰到好處，將味道及香氣推到更高層次。甜蝦壽司，黏黏爽口甜蝦跟壽司飯融為一體，香甜味美。金目鯛壽司，雪白金目鯛肉質實淨而滑嘟嘟，清爽鮮魚味道，每一趙都散發微香。壽司飯居然處理得不錯，不過濕、不過硬、不過黏，甜酸味道輕輕滲出，合格。

海膽軍艦，毫不嗇吝將海膽塞得滿滿，紫菜脆口抱著乾爽飽滿飯粒整粒掉入口中，讓舌頭不停攪拌使其融合。海膽鮮味出眾，半帶滿點腥味，好味道。鵝肝帶子壽司，創意壽司好有趣，將一丁點鵝肝放在帶子刺生上，最後淋上照燒醬，甜甜的散發著帶子鮮味，鵝肝都唔多食到，但整體味道唔錯。

海膽三色花，討好既外形，毫不猶豫大大啖整粒吞下，吞拿魚、油甘魚撞上三文魚，每種魚肉各具特色，質感互相牽引，滑彈鮮嫩嚥嚥韌同時出現，三種魚味再併上海膽，味道跟質感都非常複雜得意。軟殼蟹手卷，高質炸軟殼蟹，金黃乾爽鬆化軟棉棉，無話硬到石頭或盔甲一樣，用香口紫菜捲起併上蟹籽、青瓜、沙律醬清爽味道，那有難食之理。不幸地紫菜不脆口，變腍了 ﹗可能因為大量裝作，所以微微放長左少少時間。

蒜片炒牛柳粒，炒功了得，香口非常，蒜香突出而濃烈，牛柳粒 7 成熟而帶肉汁，質地外有嚼勁、肉有軟腍，夾著蒜片齊齊食更好味 ﹗辣酒煮花螺，辣酒汁麻麻地，味淡而香氣欠棒，一試無妨。黃咖哩炒蟹，日式咖哩都是偏甜帶果味的，依個黃咖哩都不例外，味道唔錯，但蟹肉又腍又霉呢，新鮮度強差人意。

牛肉湯烏冬，簡單又好味 ﹗日式甜醬油加上牛肉片、鮮雞蛋、紹菜絲、鮮冬菇已經使到湯底非常香甜，烏冬滑滑齊齊掃入口，快靚正 ﹗冷稻庭烏冬，黎個冰火先 ﹗剛倒左碗熱辣辣牛肉湯烏冬，覺得唔多夠喉，梗係要好事成雙啦 ﹗冷稻庭嚥韌彈牙滑溜溜，米香非常，撈上淡醬油青蔥紫菜沾小小 wasabi，清涼又清爽，好好味啊 ﹗

日本溫泉蛋，涼浸浸溫泉蛋沾上淡醬油一倒入口，甘香蛋漿口內爆開，滲進每一條齒縫，流過乾涸的味蕾，好舒服又美味可口呢 ﹗牛油炒粟米，肥嘟嘟、脹卜卜粟米牛油味香濃，一咬爆汁 ﹗識食一定全部倒晒入口連環爆破，爽到震呀 ﹗

日本蕃薯天婦羅、溫室南瓜天婦羅、有機茄子天婦羅、有機冬菇天婦羅、大蝦天婦羅，真正的天婦羅，讚 ﹗天婦羅脆漿必須炸得白雪雪而鬆化，像雲又像霧一般輕盈通透，若隱若現，這樣才是高手 ﹗絕對不會油淋淋、硬掘掘、厚疊疊、黑炆炆的。蕃薯及南瓜天然無添加的甜味，淡淡的，美味清爽。茄子軟棉、冬菇爽彈、大蝦鮮嫩，無投訴。

蒜蓉蘆筍炒珊瑚蚌，依個配搭真係如虎添翼，味道及質感都襯到不得了 ﹗泰國蘆筍幼細爽脆又多汁，珊瑚蚌爽到索索聲，吸汁力強，充滿蒜香。珊瑚蚌捲住蘆筍齊齊食，份外滋味。

燒香草羊鞍，一大堆前菜、頭盤、小食、刺生後，終於有點啖啖肉既項目出現喇，食肉獸模式開動 ﹗燒都香噴噴又熱辣辣啊，外層微脆，裡面嫩滑水潤又 juicy，羊肉味濃滲著香草味道，只有一絲羊肉羶香，正 ﹗

蜜汁燒豬肋骨，剛才羊鞍熱辣辣，反而豬肋骨只係微暖。一字骨位置夠晒方便，一咬一扭再一扯骨肉分離，盡入口中。肉味濃郁，質感非常有彈性又有咬口，輕輕泛著蜜汁香甜，肉汁豐富濕潤，好味道。

炸魷魚鬚，完全睇唔出係魷魚鬚，炸粉太多又硬，食粉多過食魷魚，失望。撇開炸粉，魷魚魷香口味濃，好食架喎。北海燒帆立貝，帶子肉太細啊，面頭淋上大量青紅椒沙律醬汁，酸酸甜甜都幾開胃既，還可以啦。汁煮牛舌，厚切牛舌非常濕潤，醬汁已完全滲透牛舌，每口都芳香無比，棉棉彈彈的，微甜帶牛味而不羶，好味。

鹽燒牛舌，跟剛才汁煮牛舌完全唔同，非常爽口，咸香四溢而不過份，好好食。鹽燒海蝦，蝦肉爽嫩彈牙，蝦膏甘甜，全身散發著燒烤香氣，正 ﹗燒雞軟骨，燒得乾爽不油不膩，脆卜卜趙到咯咯聲，香甜又食得過癮。鹽燒雞翼，我真係唔多喜歡見到開邊燒呢，肉汁流失乾爭爭。

極上大喜屋放題種類及款式琳瑯滿目、百花齊放，我已經飽到食唔落，最衰食左兩碗烏冬啦 ﹗還有好多好多菜色未試呢，無奈地都要投降喇 ﹗