餃掂手工餃子雲吞專門店 (已結業)

媽媽同我都鍾意食餃子，聽聞界限街開咗間好「掂」嘅餃子店，就帶佢嚟試吓！店面好光猛闊落，職員帶咗我哋入去偏廳度坐，張枱夠大，枱上放滿各式各樣嘅調味料，仲有成樽醃蘿蔔任食唔嬲！媽媽見到有湯品可叫，即刻雙眼發光，當然要點呢個狀元九鼎湯（粉葛鯪魚鯽魚湯）。一飲就知冇落味精，清得黎夠足料，叫完一碗share，之後encore 再叫多碗！前菜我點左皮蛋$18，麻辣味只是以碟底的少量辣油帶出，冇其他調味或剁辣，味道較為單一。試左個招牌松茸豬肉餃（灼），$65有8隻，餃子size 夠大，豬剁得鬆軟，每口都要清香嘅松茸味，同豬肉非常搭配。好鐘意其他餃可以雙拼咁叫，可以試多約幾款，韮菜係我至愛必點，拼埋雲耳椰菜7隻共$37。湯底都係九鼎湯，不過煮完餃子會比淨湯油啲。芝士煎餃好出色，有粟米粒又要爆瀉嘅熱辣辣芝士，煎到金黃色又脆又香，唔錯！呢度質素唔錯，地點又方便，得閒挑起食餃子癮嘅時候又要返嚟幫襯啦！