Baby Elephant Thai Kitchen

營業中

休息中

今日去咗赤柱行街，晏晝就隨便喺海邊揀咗間餐廳，人流雖然唔少，但係亦都唔需要排隊，天氣好好，揀咗有陽光嘅位，但係之後有啲後悔，因為冇遮蔭。呢間餐廳分開咗兩邊，一邊係泰國菜，一邊係西餐，無論你坐邊一邊，兩間舖頭嘅Menu都可以揀。 叫咗一個青咖喱豬頸肉配薄餅同一個德國炸豬手配薯條。其中一個配有餐湯，係菠菜湯，我嫌個菠菜味太濃，而且催咗好多次先至送到嚟。至於個青咖喱味道尚可，豬頸肉都有咬口，尚算腍，薄餅微脆，但可能天氣凍嘅關係，薄餅好快凍咗。至於個豬手，雖然味道OK，但係炸得太硬，好難咬，另一半啲牙勁啲先比較容易咬得到。炸薯條係扭紋薯條，啱啱炸起，都幾脆，但始終天氣凍，keep唔到好耐。夥計服務態度其實唔差，但似乎一人多菜單就會亂。 至於環境喺海邊加埋好天氣真係冇得輸，價錢喺赤柱海邊餐廳嚟講，我覺得唔算貴，但當然呢個價錢可以喺出面食得好啲。