輝記雞粥檔

營業中

休息中

天氣又開始涼涼地，唔想成日打邊爐咁熱氣，食返碗熱辣辣嘅粥都係一個唔錯嘅選擇。雖然平時唔太鍾意食粥，因為覺得粥都係淡口又無乜嘢食，唔係病都會想食，但食過輝記又開始有D改觀...每晚八點過後，直至清晨六點，就係輝記營業嘅時間，岩晒一眾「夜貓」覓食。輝記真係可以用「其貌不揚」嚟形容！佢嘅廚房就係後巷，幾張稀疏嘅褶枱放係路邊同後巷。門面唔吸引，但夠地道，幾個夥計同老闆分工合作，每晚都吸引不少食客光顧。菜牌設計老派，一句「創1976」已經暴露粥店年紀，數數手指原來已經開咗四十年。之前已經食過輝記嘅雞粥，雞肉肉質結實，唔似出面食嗰D咁淡口。今次決定試下佢嘅燒鴨粥！出面食嘅粥多數都係偏白稠綿微鹹，但輝記嘅粥偏黃，燒鴨嘅鹹味滲入粥裡面，而且聽聞輝記煲粥唔係用清水，而係用下欄熬成嘅湯，食落去仲可以食到一粒粒嘅菜脯，都幾好味！可惜嘅係，今次嘅粥比上次稀咗少少，希望下次可以Keep返個水準啦！炒麵夠鍋氣，不過不失！油炸鬼雖然唔係即炸，所以唔算好脆，但腸粉皮夠滑，呢個炸兩都算ok，係份量少咗D！深宵突然肚餓，諗唔到食咩，又唔想食麥記咁頹，都可以考慮支持小店，食返碗靚粥㗎！