燒肉一番

營業中

休息中

餐廳主打性價比高嘅路線，以前喺附近返工嘅時候間唔中口痕都會過嚟食個午餐價錢又唔貴，又可以食嚇燒肉不知幾爽。估唔到咁耐冇嚟，佢仲有keep住做優惠，本身價錢已經唔算貴落order嗰陣竟然見到惠顧一個套餐仲可以送多50 gram嘅肉。$100都唔使食到兩份肉又有飯又有湯又有前菜，呢個價錢都唔係好多間餐廳做得到。個人覺得黎到呢度，必點嘅係厚切五花肉，因為真係超級大塊，燒完之後爽口彈牙肉味又濃。另外嗰日另外印象深刻嘅係牛仔骨，又係一兜大大件，個份量係認真驚人。原條嘅鯖魚都有手臂咁長鋪滿曬成個爐。當日嘅炸物都合格，脆卜卜熱辣辣。每張枱嘅旁邊都有四款嘅調味料分別係麻醬、黑椒、巖鹽、同埋燒汁。我覺得基本上撒少少黑椒同埋巖鹽已經非常足夠。雖則佢每舊肉睇落去都好似雪住，但擺咗一陣解凍咗之後燒返起佢肉味都係非常之濃郁。總結：性價比非常高， $100有找仲要做埋promotion，無論喺附近返工定係住開嘅，得閒口痕想食嚇燒肉，過嚟呢度真係不二之選。可能餐廳選址比較偏僻，我個人覺得呢間餐廳值得更多人流。