沐白小農 (已結業)

香港愈黎愈多由台灣開過黎既茶飲店，沐白小農亦係其中一家，之前飲過尖沙咀店覺得唔錯，今日同朋友行過元朗分店，同佢地分享呢間唔錯，佢地未試過，而呢間又係第一間分店，咁就去沐白小農第一間開係香港既分店再飲過。環境唔算大間，成間用藍天白雲既主題，望落去好有小清新、台灣風格既感覺，仲有影相打卡牆。餐牌主打黑糖波霸鮮奶、大甲芋頭鮮奶等等，亦有草莓鮮奶、抹茶鮮奶，今日一行三人就各自要三杯唔同既款式。草莓鮮奶 $35有兩層漸變色，下層係鮮奶，上層係草莓，攪匀再飲，原來唔係草莓味咁簡單，係有粒粒草莓粒，好有驚喜，加上濃稠鮮奶，味道十分好！大甲芋頭鮮奶 $30芋頭蓉份量好多，一定一定要搖匀再飲，之前飲過一試愛上，攪匀後每一啖都係濃郁芋頭同鮮奶，啖啖有芋頭蓉咬，最怕芋頭加太多糖水變左死甜，但呢款唔會，係我每次必定會encore既一款。沐白黑糖波霸鮮奶 $30招牌中既招牌，雖然已經過左黑糖熱潮，但同行朋友係黑糖迷，佢見到賣相好吸引都想試試，同一般做法一樣係用明治鮮奶，掛杯紋幾靚，黑糖珍珠煙韌夠味，唔會過甜。總括而言，真係一間我會不停重覆幫襯既茶飲店，特別係草莓鮮奶同埋大甲芋頭鮮奶。