秋香 (康景花園)

營業中

休息中

今日落大雨，有小小涼意。入到屯門，朋友提意不如食煲仔飯，就帶咗我黎呢間係行仔嘅小小日式居酒屋到食晚飯。唔知係唔係大雨關係，當晚餐廳竟然得一枱客。入到去環境幾舒適，仲有啲玩味成份重嘅牌匾，都幾打卡。先叫一個主打嘅白鱔煲仔飯，再叫咗啲小食同串燒。雞皮餃子，唐揚豆池魚兩款炸物都好脆，雞皮餃子(4隻)偏油一啲但配咗個柚子醋食又唔錯。豆池魚(7-8條)配咗他他醬，魚仔黎講都幾漲卜卜厚肉，不過就要小心幼骨。日本味嶒釀蟹蓋期間限定嘅蟹蓋，蟹蓋入面有蟹肉蟹糕同蛋黃，撈勻後就可以點麵包條食，麵包有啲似sour dough質地，同埋有烘底。醬燒大圓茄子價錢有少少貴，佢係短身圓圓地果種茄子，介咗花再塗醬燒，面頭再加啲木魚碎。燒茄子本身就好食，但我唔係點食到佢醬燒嘅醬。原隻大啡菇，雞肝大啡菇好厚肉好juice。雞肝都幾大粒，好香炭燒味。鹽燒白鱔煲仔飯真係好好食！有5大塊鹽燒白鱔，白鱔好厚肉好爽口，魚皮都好煙韌，燒完好香口。中間有粒蛋黃同櫻花蝦，撈勻一齊食真係唔錯，但佢就冇飯焦。啲飯都有燒白鱔嘅醬汁同魚油香。最後加埋蟹蓋啲蟹肉蟹糕落個飯到食，好正。