御苑皇宴 (已結業) 查看

以前試過Mega Box果間御苑皇宴，環境同食物都唔錯，今次朋友聚會，選了尖沙咀新開果間，裝修好靚，比Mega Box果間仲多左個無敵海景。食物方面，真係好好味！有幾味特別值得推介︰土匪羊扒 – 見個名幾攪鬼，加上本身好羊，所以一試。個樣有D似黑椒雞扒，食落好香，好特別，仲好有羊味，羊癡必食！上枱無幾耐，已經被橫掃，差D連相都影唔到！不過，唔記得問下點解叫「土匪羊扒」…有朋友建議食咖哩牛腩。咖哩牛腩周街都有，雖然我好咖哩，但無物期望。點知出乎意料，好濃既咖哩，勁香！跟窩巴食，非常一流！聽酒樓D人講，平日佢地中午有做埋免加一碟頭飯生意，呢味咖哩牛腩好受歡迎架！食得多肉，黎個菜。酒樓推介下，點左豆苤，即係豆苗最嫩果部分，真係刁鑽。結果真係無介紹錯！比一般豆苗更好味！甜品方面，我地點左土豆西米焗布甸，貪佢夠特別。平日多數係蓮蓉或芋蓉，估唔到土豆都得，而且仲正，又唔會太甜！正！好滿足！正如之前Ms Chung食評講，人、境、食都好好既一餐！一定會再去！