板上 (中海日升中心) (已結業)

社蓄生活繼續，所以觀塘搵食之旅亦都繼續！好在呢邊餐廳真係唔少，今次就行多幾步，嚟到呢間板上搵下食先！入到嚟感覺真係幾好，平時觀塘食咩都人山人海背貼背，難得呢度幾寬敞，枱櫈都唔逼夾！一睇之下，仲有幾多特色嘢飲可以叫，印象已經唔錯。見個名幾有趣，所以叫咗個山賊醬燒燻蹄，同埋一個洋蔥花！個飯份量唔算好大，啱晒女士們食，但係燻蹄就真係好足料！鋪滿晒直情見唔到個飯，可以話係食極都有！個醬都係重點，幾香口，甜甜哋幾開胃，值得一試。同埋佢都有啲菜菜一齊上，又有粟米伴碟，口感層次都豐富架！至於洋蔥花就係大家好熟悉嘅歐美式炸洋蔥，一層層幾靚！佢個沙律醬味道好好，夾埋炸洋蔥食一流！食唔停口！不過有少少美中不足係油咗少少，不過炸嘢係有少少難避免喇。飲嘢叫咗生薑蜜，都幾真材實料，應該係用韓式一樽嗰啲開，有晒薑喺底。其實最想試係巨蜂乳酸梳打，但係今日凍冰冰想飲熱嘢，下次一定試！