Go Inside Kitchen (已結業)

今晚來到觀塘接朋友收工，上網見佢同之前食過既籽樂廚房(尖沙咀)係姊妹店，都係社企餐廳，覺得啲食物應該都正既，於是book左係度食晚餐。  平日晚上人流唔算多，工廠大廈又比較大面積，坐得好舒服，可以同朋友慢慢吹住水食，唔洗怕急住食完還台。蒜蓉法包 一人一塊，好脆，同今晚個意大利菜湯好夾。菜湯熱辣辣上台，入面好多料，好多蔬菜，仲有啲麵條，營養價值幾多幾高。頭盤揀左 煙鴨胸田園沙津，落左柚子汁好開胃，3塊煙鴨胸仲係涼涼地，好淋好易入口，好好食。到我地既主題喇，BBQ汁燒原條西班牙黑毛豬肋骨 ($368/SET)，超級大條!! 上菜個下我同朋友都嚇親!!咁大條真係一個人食唔晒嫁！！ 肋骨整到淋淋地，好容易切同咬。個BBQ汁都好正，下面仲有薯條。另外叫多左碟 香煎帶子淡蝦醬意大利飯 ($148)，2粒大大粒嘅帶子，啲飯煙煙韌韌，醬汁都算飽嘅，我地2個女仔咁樣食法就屬於剛剛好喇。最後甜品揀左 藍莓芝士餅 2件，唔濟肚嘅唔洗擔心食唔落。個餅底都好脆，係新鮮整出來嘅。 野飲要左熱檸檬水，有樽熱水俾我自己倒嘅，一Set咁幾得意。埋單時店員仲送左coupon 俾我地下次幫襯用，全單8折。