Gochi

營業中

休息中

星期六同呀媽去咗久違嘅樂富，因為我中小學讀書都係附近。我媽好耐無嚟過，成個樂富變哂樣😳。我哋去咗新開嘅「Gochi」食午餐，如果喺商場入面搵呢間餐廳可能就有啲難度，因為佢喺外圍，好近地鐵站，出閘行過去巴士站嗰邊就會見到。餐廳環境好舒適，面積好大，有兩層(同時亦有兩個出入口)，上層有大玻璃窗，所以透過天然光，令到內在好光猛。適逢過咗聖誕無耐🎄，餐廳仍有聖誕裝飾，令我感覺特別開心。帶位嘅店員有禮，又會問我哋餐廳易唔易搵😁。坐耐冇耐，店員就送上開水同餐牌。週末都有提供午市套餐🍽，大部份都係$138，個別項目要再加錢。價錢方面中矩中舉啦，不過午餐選擇頗多的，亦涵蓋唔同款式。是日餐湯係南瓜湯🎃，味道普通，因為略嫌稀咗啲。🥖伴旁有兩片法國麵包，店員細心問道我哋要牛油定黑醋油。題外話，前菜唔要湯可以要沙律。辣肉腸芝士薄餅🍕，Pizza超大個，難度這是一人份嗎？？？我媽話覺得起碼有12吋，我認為就算冇，都唔少過10吋。薄餅咁大個，餐廳應該要將佢一分為八嘛🤣。薄餅連邊皮都意外地鬆軟，唔會硬到食淨條邊。如果薄餅邊無咁燶就更好，雖然而家都唔算好燶。辣肉腸鹹香十足，個人認為好過西班牙火腿，最原始就係最好食😋。