熱沙咖啡 (已搬遷) 新店位置

因為爆假，所以今日請左半日假，叫埋男朋友請假陪我。我計劃左去馬灣走一轉，首先當然係要食午餐醫肚啦。我地見到呢間餐廳好有特色，平時又好少食土耳其菜，加埋本身今年要去土耳其旅行但因為疫情無得去，於是入左去食。我地揀左特色園池素雞飯同香濃烤雞飯，兩款都色彩繽紛，食慾大增。特色園池素雞飯用左五色蔬菜製成，行健康路線。有鷹嘴豆泥、鷹嘴豆、土耳其沙律、豆制既素雞、粟米、紅椒、洋蔥、飯，清新又飽肚。香濃烤雞飯有大量蔬菜伴碟，烤雞十分嫩滑，白飯索左啲雞油，好香口。老闆話佢地餐廳係全世界首間以精品咖啡製作方式沖製土耳其咖啡，精品咖啡既咖啡因比市面上既咖啡少八成。老闆當即急不及待即沖哥倫比亞國烘咖啡俾我地品嚐。哥倫比亞國烘咖啡帶酸味，無論靜止、順轉、逆轉杯咖啡都有唔同既香氣同味道，搖動咖啡可以釋放咖啡粉中二氧化碳。老闆好熱情同我地介紹土耳其熱沙咖啡、手沖鴛鴦、雲南泡茶。第一次體驗用300度既熱沙沖製土耳其咖啡，十分有趣。土耳其專用既咖啡杯別具一格，好精美。老闆仲手沖左凍同熱既鴛鴦俾我地，好特別。又沖製雲南泡茶，味道清香。