泰海鮮 (已結業)

就快過年，又係時候約食團年飯兼聚舊喇！朋友們住新界西多，今次就揀咗屯門三聖村大排檔～～ 泰海鮮食團年飯。呢次係我第二次嚟呢度食，雖然佢叫泰海鮮，但我哋並無叫泰菜，反而都係以海鮮宴為主。你可以喺餐廳直接叫，又或者去附近海鮮檔 （今次部份海鮮喺關財記買），揀生猛海鮮帶入餐廳比師傅加工，無論係白灼／清蒸／豉椒炒／炆／蒜蓉蒸等等，總之你想點煮都得，明碼實價列晒加工費幾多。嚟呢度必點海鮮湯，用雜魚、瀨尿蝦、沙白蜆、番茄薯仔去煲，用料豐富，味道勁鮮甜！不過記得要趁熱飲先好飲呀！我對「泰皇芝心蝦丸」念念不忘，以麵包粒包住去炸，入面蝦膠勁彈牙，再咬落去啲芝士流心咇出嚟，口感豐富，小心熱呀！（一碟3粒，我哋再加錢)鳳梨鮮排骨，酸甜惹味，送飯一流！呢碟係最快清晒，可想而知幾受歡迎？青山灣焗芝士龍蝦(3隻開邊)，每隻都好大隻，焗到金黃色，賣相吸引！你睇我用筷子篤入去，啲芝士幾厚？咬落脆脆哋，肉質嫰滑，啖啖芝士鹹香，食龍蝦都飽飽哋 @@砵酒焗桶蠔，呢個係我哋買入嚟加工，師傅提議用砵酒焗嘅煮法 (加工費每細桶$62)，少少脆，肉質肥美，少少甜又有少少酒香，真係唔錯喎！呢次團年海鮮飯頗滿足呢！