貓之眼

營業中

休息中

見到呢間餐廳有好多個好評，就打算過嚟試吓蛋包飯。點知原來呢一個抉擇非常錯誤。我哋下午2:30過嚟食飯，一行四人見餐廳唔夠座位就係餐廳外面排隊。可是一開始對我哋嘅服務態度已經大打折扣。第一個出嚟係一個比較瘦削嘅男人，佢一嚟就同我哋講所有漢堡扒嘅食物都冇晒。少咗食物嘅選擇，我哋都失望唔少。一個光頭戴眼鏡嘅男人一望到我哋就叫我哋一定要喺箭嘴後面排隊，感覺唔太友善。加上我哋其中一個朋友未到餐廳，光頭佬又同我哋講：「你仲有個朋友未到喎。」感覺我哋阻住佢哋下午3:00收工咁，呢種語氣俾我哋感覺好刺耳。幾經辛苦我哋終於坐低食飯，喺嗌嘢食嘅時候我哋被要求寫清楚枱號，可是食物嚟到嘅時候侍應都係唔清楚我哋邊一個嗌左啲乜嘢。其中一個朋友嗌咗熱檸茶，侍應就俾咗凍檸茶加冰。。。至於食物質素，味道不過不失。三色蛋包飯入面嘅白飯口感過腍，咖喱同蕃茄嘅味道冇乜分別。唯一一樣值得稱讚嘅係賣相還可以接受，但係好多餐廳都可以做得比呢間好。進餐途中，我哋仲親眼見到有一個女仔同一對男女中途放棄光顧呢間餐廳。多半都係因為差劣嘅服務態度同埋缺乏食物選擇嘅原因罷了。經歷過今次嘅進餐經驗，我以後都唔會嚟呢間餐廳食飯了。