民聲冰室

營業中

休息中

睇到好多人推介民聲冰室嘅肉餅山，今日入大坑試下，鋪頭得 3-4 張枱，可以選擇坐室外，不過天氣太熱，公眾假期下2點左右，都係選擇等室內枱，等咗10分鐘就有位，上菜都好快。午餐11:30-15:00，公眾假期飲品要正價，無優惠價加配。叫咗出名嘅肉餅山同客家鹽焗手撕雞，凍檸茶少冰少甜 同 凍奶茶少冰少甜。肉餅山，真係名不虛傳，好好食，鹹蛋黃係起莎質地，肉餅肥瘦適中，唔鞋口，亦唔會覺得好膩好鹹，呈山型，肉餅都可以蒸得受熱均勻，唔會入面唔熟而出面太熟，配蔥花 甜醬油，好適合送飯。客家鹽焗手撕雞，雞肉一絲絲，質地好幼滑，唔太食到鹽焗味，味道係有陣麻油香同芫荽香味。份量唔算好多，不過兩個人食，份量剛剛好。凍檸茶少冰少甜 同 凍奶茶少冰少甜，凍檸茶好解渴，少甜之後，味道剛剛好，有種飲緊檸檬冰茶嘅感覺，好清新同涼快，茶底本身都係凍，而唔係室溫茶底，就咁加冰嗰種。凍奶茶中規中矩。老闆好好人，好親民又有禮貌，我地走嗰陣仲多謝我地支持，埋單又收整數，收平幾蚊，已經好少餐廳有呢種人情味。