火鍋撚 (日富里百好大廈)

營業中

休息中

今日同埋女朋友同佢個妹三個人去左西環，就揀咗呢間火鍋撚試吓。一入到去就揀咗個蜂巢豆腐白湯鍋，呢個湯底都幾特別呀又有秘製鴨血，又有原條人參，咁特別嘅湯底打完邊爐一定要當湯咁飲返碗先得。由於本人食嘢好怕肥膩，但係見隔離枱個黑豚肉肥瘦適中，於是就叫咗碟。上枱果然冇令我失望，淥到去啱啱變色就食，鮮嫩無比，完全唔會有豬嘅騷味。而羊肉就啱啱相反，梗係要有少少騷味先好食。呢度嘅羊肉騷味啱啱好即係代表佢新鮮得來質量十分好。而且佢一碟嘅份量十足，三個人一疊都夠晒數。我打邊爐就成日都需要飲好多嘢，可能因為熱氣啦。呢度有好多款唔同嘅嘢飲，打邊爐咁熱氣就梗係要叫啲清潤嘅嚟飲啦。於是乎我哋就叫咗菊花杞子龍眼蜜飲，佢有淡淡的菊花香味，配合龍眼密嘅清甜，好能夠舒緩打邊爐嘅熱氣。除此之外，我哋仲叫咗野生竹笙、爆漿牛丸、皇帝菜等等。竹笙除咗吸咗個湯嘅精華之外，本身爽口嘅感覺亦係我杯茶。打完邊爐後，忍唔住叫咗個烏冬配返佢個湯。個湯有淡淡的人蔘味，真係忍唔住飲咗兩碗。呢度好窩心嘅係食完邊爐之後佢有個芋圓仙草糖水，仙草絕對有清熱嘅功效，不過如果可以少甜嘅話就更加Perfect啦。