蘭州拉麵店 (已結業)

睇「荃灣友」嘅fb page知道佢7月9日關門大吉，先發現佢同荃灣另一名店山西刀削麵原來係同一個老細。位於力生樓下，未搬入荃灣前已經聽過朋友推薦，但路過好多次都無入過去食。page內有人話呢間好食過其他兩間分店，所以趁最後三天幫襯一下。店內只有四張圓枱，好雲吞麵鋪的格局，感覺同沙咀道那間裝修後的刀削麵鋪好大分別，呢度感覺親切溫馨好多。上海雲吞拉麵+豆漿，$48，上次去刀削麵嗰邊都係食上海雲吞刀削麵，隻碗一樣，但湯底就不一樣，呢個似大地魚湯底，嗰邊就係豉油湯底，我比較鍾意呢個，比較有鮮味。見住姐姐喺店內親手包緊雲吞，呢度嘅雲吞皮薄，同刀削麵嗰邊厚皮又完全唔一樣，同樣都係鍾意呢度多啲。拉麵有韌性不黏口，同樣出色。光榮結業，期間有不少熟客街坊到場作最後支持，廚師們會到另外兩間鋪繼續工作，不致失業，所以沒有什麼離愁別緒，反而談笑風生。他們談到「荃灣友」page內網友給它們的稱讚，更感自豪，而我在旁就會心微笑。他們如數家珍地說著對每個熟客的印象，我想轉了新鋪應該再找不到了。