名館 (已結業)

今日有人升職請食lunch，仲話要帶我試間新餐廳，咁我當然卻之不恭啦!上到明館，發現呢度真係好新淨，原來啱啱開張左幾日！裝修好摩登，而且座位之間非常闊落，完全唔合乎經濟效益喎睇吓點心紙，發現選擇都幾多喎！除咗一啲普通嘅點心，有啲新潮野，亦有啲傳統野。我哋今日得兩個人，實在唔能夠叫太多嘅食物，左諗右諗，揀咗四樣嘢。先來厚切叉燒皇，一碟雖然唔係好多件，但每件都係厚切的半肥瘦叉燒，而且淋咗厚厚嘅蜜糖，咬落又腍又入味，好食！然後嚟咗醬滷牛展五菜陽春面，一上枱最吸睛嘅係嗰半隻溏心蛋然後就發現，原來五菜陽春面嘅意思係有五種顏色嘅麵，我估嗰啲係蔬菜麵啦，雖然食落冇乜蔬菜味，但感覺都好健康！之後兩個蒸嘅點心都黎埋，小籠包一客有五隻，每隻湯汁都好飽滿，而且小籠包嘅皮薄而煙韌，質素絕對比得上正宗上海鋪嘅出品！鵪𪂹蛋燒賣係我至愛嘅點心之一，唔係好多地方有得食，既然名館有我梗係唔會錯過啦！一籠兩粒，鵪𪂹蛋加大大粒燒賣，真材實料，實屬必食推介！另外，來呢度飲茶係唔使揀要咩茶葉嘅，呢度一概提供蕎麥茶，味道有啲似玄米茶，但飲落有淡淡麥香，而且感覺消滯，真係極都唔夠喉。呢度仲有兩個獨立嘅包箱，下次多幾個人來可以坐呢度