快活美食茶餐廳 (已結業)

由於要為分店跟埋d手尾，所以元旦日選擇了返寫字自己一個人開工，而阿J 就同外父外母及一眾友人去大公館飲茶，無錯，又係大公館，呢排佢地已經去過起碼6次了..... 做得正興起，但又肚餓，決定買個快靓正外賣飯盒醫肚，公眾假期上環好多茶餐廳都休息，好彩附近呢間有開。見平日 lunch time 好多人排哂長龍買這裡的飯盒，估計質素應該唔錯。選擇凡多，點了咖哩牛脷飯加熱檸檬水。咖哩汁香濃得黎帶點甜，比起大字頭快餐店的咖哩汁好味好多，剩係用個汁都可以食哂成個飯。牛脷都幾厚，夠淋，入味，有成十件，抵讚。薯仔做伴菜，這裡的薯仔先經過炸才煮熟，所以不會散哂同過淋。要特別一提是這裡飯盒的份量 ~ 飯盒的size 參唔多係張A4紙咁大，比起有d茶餐廳用特細飯盒來得大方，重點在於唔係得個盒大，裡面d飯餸都係一樣大份量，連我大胃王阿P 都話飽 。