影片
以上資料只供參考, 請與餐廳確認詳情
搞唔掂 見佢岩岩開好多人排隊 今日行過無乜人先入去試吓無味 份量少 杯加啡好似一開十咁好似食緊學校canteen 既質素 灣仔要平 佢3餸$50 大把選擇 唔使試呀真係 真係唔好 無下次
繼續閱讀
下午茶時段，見到舖面幾「四正」，又有位坐，自己臨急臨忙，諗住坐低食個雙餸飯都唔錯，點知原來一間餐廳可以垃圾到咁。叫咗薯仔雞同咕嚕肉，都係最普通嘅餸，以為叫呢啲正正常常，點知味精勁重，鹹到無辦法接受。隔咗一個鐘之後，我條頸、肋骨、大脾、腳眼開始起疹，唔係細細達，每一個紅疹範圍比一個手掌仲要大，到後期全身紅曬，連臉都有。我有諗過係咪因為天氣熱出疹，定係食物敏感，還是其他原因。到夜晚睇醫生嘅時候，醫生話係急性風癩，然後個護士就講咗一句：「你係咪食好重味精嘅嘢呀？」我先醒起晏晝食咗咁咸嘅嘢。上網睇急性風癩都有好多原因嘅，主要都係藥物、食物、衣物等等嘅致敏原造成。又唔係話100%因為呢餐所以搞到咁，可能加加埋埋其他原因，但護士咁講，我咁聽囉。但就算係唔係呢餐搞到生風癩都好，40蚊一個兩餸飯都唔係平，又唔好食，一定冇下次。
繼續閱讀
行過見到呢一間新開張無幾耐既雙餸王，見到d餸幾靚，就入咗去試下。係灣仔呢頭食飯有平有貴，但平價通常都係外賣雙餸/燒味飯/車仔麵。估唔到係修頓球場附近嘅譚臣道有一間隱世雙餸王。雙餸王呢個名真係無改錯，食過咁多間雙餸飯，呢間絕對夠水準入三甲。呢度既餸菜選擇都好多，每日都有少少唔同，岩晒我呢d 想食翻食開個幾樣又想試新嘢既人。店鋪每隔一段時間都會新鮮出爐少量新菜式，可以話係新鮮感100分。$40雙餸 $47三餸 包熱飲，非常抵食。食過幾次既我，最推薦係燒鰻魚、咕嚕雞，同埋咸蛋蒸肉餅。燒鰻魚係好難得先會出現既靚餸，想食真係睇彩數。難得比我食到一次，啖啖肉加埋有嚼勁既鰻魚皮，配搭店舖用既日本珍珠米，用平民價錢但食到日本風味，簡直係世界第一！而咕嚕雞同咸蛋蒸肉餅就係佢地既常備菜，大概八成機會會見到佢哋。我最中意咕嚕雞先炸後炒，淋上咕嚕汁炒完之後仍然保持到炸過既口感，咕嚕汁亦都食得出非常健康，唔會好咸但岩岩好，送飯一流！最後要講既咸蛋蒸肉餅就係差唔多接近特式菜，原因係佢完全無落肥肉去整肉餅！成日聽好多人講：「唔好以為蒸肉餅好健康，其實好肥架！因為係用好多肥肉！」，但係呢度既蒸肉餅不但無落肥肉，而且無因此而變得難食或者失左口感，反而食上黎無咁大罪惡感，開心又放心！加上店內裝修比較有時代感，粉紅色白色牆身，加上雲石飯枱同木櫈，堂食雙餸飯都可以好chill。啱晒呢頭翻工既打工仔，想食平d又唔想外賣飯盒，黎呢度享受下親民價錢又高質既雙餸飯就一流！
繼續閱讀
近排屋企少煮飯，所以晏晝想食下啲住家飯，同時話呢間雙餸王味道比較清淡嘅，比較健康幾似住家飯，而且價錢又合理去到發現雙餸飯$38，三餸嘅話就$45，真係唔貴喎，仲要包嘢飲餸菜嘅款式都幾多大概有十二、三個，款式又多，有菜、又有肉、又有魚，一定會揀到自己啱食嘅餸菜雙餸飯$38叫咗一個午餐肉炒蛋再加肉碎炒蜜糖豆兩個餸嘅份量佔咗飯盒嘅一半，如果個餸再多少少就好喇炒蛋炒得幾Creamy，應該係落咗啲牛奶去炒蜜糖豆都幾爽脆，兩送飯做到呢個質素算係咁
繼續閱讀
大熱天時，冇乜胃口，午餐唔知食乜嘢好，突然間諗起灣仔有間三餸飯，標榜住家菜食，既然口淡淡，一於就試試佢。首先講講價錢，三送飯連一杯熱嘅即磨咖啡，盛惠$45。喺灣仔來講，實在非常之抵食。食物方面，揀咗三款餸，第一種係蒸鯇魚，第二種係炒四季豆，第三種係涼瓜排骨。蒸魚味道普通，冇咩特別，同一般茶餐廳嘅貨色冇分別，唯一值得一提嘅就係佢嘅size實在非常之細，所以買呢個價錢係有原因嘅。炒四季豆係三款餸入邊最好食嘅，但係都係普通貨色，冇乜特別。涼瓜排骨方面，一擺入口，已經係感到非常之甜，應該落咗好多堂。但係涼瓜食得出係新鮮嘅，至於排骨就一般般冇乜特別。即磨咖啡就冇乜特別，由於係一早已經磨定，所以冇咗嗰種即刻磨出嚟嘅咖啡香。整體來講，食物味道唔算太出色，但係價錢搭救，喺灣仔呢個地區來講，還是過得去的。
繼續閱讀