有時喺香港搵韓燒食，唔只係想食烤肉咁簡單，而係想搵嗰種地道韓燒Feel，就係嗰種坐喺圓櫈，三五知己圍住鐵圓枱食烤肉、飲酒嘅感覺。旺角呢間韓燒專門店平昌就做到呢種地道Feel，仲要係高質任食！入場有3款御膳揀，分別只在於價錢同菜式，全部都可以120分鐘任食。想平食過口癮傾計飲酒；抑或貴食高質豬牛烤肉，完全自己話事。
平昌店內好有韓國地道氣氛。
國王御膳 任食高質烤肉
食得最豪最正就係國王御膳，HK$400有找就食到逾90款特級美國牛、西班牙豬、海鮮同韓式料理。
超多款式美國牛
要食到回本，國王御膳嘅牛類係必點！全部美國來貨，如有汁特級牛肉眼、安格斯黑牛金錢展、特級牛板腱等。全部牛味夠濃，均勻油脂好似無筋咁，入口夠軟綿。
特級西班牙五花肉
烤肉梗係「肉」係主角啦，除咗美國靚牛，豬肉都係高質貨—西班牙伊比利亞五花肉，厚切五花肉一落烤板就融出油脂，入口夠油香又鬆化。記著食埋香草羊架同3吋BB豬仔骨，帶骨但夠多肉，唔會食到無癮。
香港罕有 外脆內嫩青衣柳
任食最怕食到「頹海鮮」，所謂嘅頹就係唔新鮮。但你一試平昌嘅特級象拔蚌片，嗰種爽彈咬口係新鮮貨先做到。店主同樣推介香港罕有嘅青衣柳，有別於一般魚柳燒完都唔乾身，反而外脆內嫩。
各款高質熟食 自家製豚肉腸
燒到悶悶哋嘅話，仲有唔少高質熟食換吓口味。編輯特別推介社洛克豚肉腸，係店家用豬肉肉碎打出嚟，咬落口感更紮實又有肉味外，亦唔怕食到額外添加劑啦。
社洛克豚肉腸
韓式白肉
調味鴨舌
世子御膳 中庸價錢食高級料
想揀個價錢中庸又食到好嘢嘅套餐，可以揀世子御膳。HK$300有找就食到70款高級豬牛、海鮮同醬油蝦。
韓燒必食護心肉
店主話自己食韓燒都必點護心肉，所以一定要公諸同好呀！其實護心肉係橫隔膜同肝之間嘅肉，燒香後油分確實唔多，食落又爽滑彈牙，包埋生菜食真係會上癮。
多款高級肉類揀
話明係120分鐘任食，梗係要試埋其他肉啦，世子御膳仲有牛肉眼、牛前胸腹肉、辣豬腸都好推介。
牛前胸腹肉係厚切，鍾意啖啖肉嘅必試。
韓國當地人好鍾意食辣豬腸、牛大腸，但香港好少地方可以食到。
任食自家製醬油蝦
最估唔到係韓燒店都有醬油蝦食，仲要係任食呀！而且店家嘅熟食都係自家製，連醬油蝦都係自家醃製㗎，唔駛驚由韓國空運過程會變質，食落仲好香酒味𠻹！
燉藍青口同帶子都係新鮮貨。
大君御膳 聚會抵食之選
成班朋友約出嚟志在飲吓酒聚舊，順便食吓烤肉過口癮嘅話，大君御膳就係抵食之選，平日入場仲HK$200有找，食到逾40款前菜、豬肉、雞肉、海鮮同韓式料理。
肉類應有盡有
雖然價錢咁抵，但肉類選擇都好多！LA牛排、薄切五花腩片、豬梅頭肉等，基本烤肉類都應有盡有。
新鮮海鮮料
講明係平得嚟抵食，海鮮款都有返咁上下，半殼石蠔、虎蝦同帶子都有。
熱辣辣韓式傳統鍋物
仲有各款鍋物揀，韓國傳統嘅辣海鮮豆腐湯、肥牛大醬鍋同豬肉泡菜鍋都有。
肥牛大醬鍋
辣海鮮豆腐湯
一眼睇晒3款御膳價錢！
國王御膳
星期一至四 HK$378(成人)／HK$218(小童及長者)
星期五至日 HK$398(成人)／HK$218(小童及長者)
世子御膳
星期一至四 HK$278(成人)／HK$158(小童及長者)
星期五至日 HK$298(成人)／HK$158(小童及長者)
大君御膳
星期一至四 HK$198(成人)／HK$138(小童及長者)
星期五至日 HK$218(成人)／HK$138(小童及長者)
平昌
地址: 旺角西洋菜街1號兆萬中心13樓
電話: 26121682