你以為黃竹坑山旮旯咁遠就無好嘢食？咁你就錯喇，唔講唔知，原來黃竹坑有唔少café、熟食市場，連泰國菜都有，真係估佢唔到啊。依家港鐵南港島線通咗車，由金鐘去黃竹坑只係需要兩個站，咁方便，一於等開飯仔帶你睇吓黃竹坑嘅必食餐廳喇！
傢具店舒適角落 sensory ZERO
（圖：最曉食）
Sensory Zero位於黃竹坑工業區，喺傢具店落地玻璃窗邊一角位置，樓底極高，環境舒適，最適合咖啡控嚟飲杯咖啡歎返一個下晝。呢到甜品、咖啡、輕食都有，當中唔少甜品都幾高質，吐司哄得香脆，再配上雪糕同彩色拉絲糖，單憑個賣相已經贏咗。不得不提嘅係，呢到嘅餐具、咖啡烘焙機全部都可以由傢具店買走，可以滿足埋一眾嘅餐具控。
嶄新健康素食 MUM Veggie + Coffee + Sweet
（圖：蒙奇奇、mandychoi23）
今時今日，素食都唔一定係淡而無味，食素都可以有好多花款㗎！就好似呢間café咁，以素食作為主打，而且價錢唔太貴。早餐嘅炒蛋牛角包配田園沙律，睇落無特別，但食落炒蛋炒得非常香滑、牛角包香脆鬆軟而且有彈性，令人又愛又恨。另外，午餐嘅素菜撈烏冬配上老火湯同前菜，雖然無肉，味道亦唔會失色，反而可以更清楚品嘗到蔬果嘅甜，健康嘅一餐就由呢到開始。
彷如置身外國咖啡店 Bread and Bistro
（圖：cs103）
最後一間要介紹嘅café就係Bread and Bistro，顧名思義主打係賣各款特色麵包，但lunch時段亦有供應正餐，All Day Breakfast就不過不失啦。但呢到嘅環境一流，自然光由落地玻璃透入嚟，的確會令人有一種置身外國咖啡店嘅感覺，心情都會變好啲。未完㗎，呢到仲有得賣Gelato雪糕，有食客推薦石榴味，清新而且有果香，各位嚟到黃竹坑又想食杯雪糕嘅話不妨一試。
南區人推介 青咖喱屋
（圖：Fannlsan）
想食好食嘅泰國菜唔一定要去九龍城嘅，喺黃竹坑都有唔少。呢間喺南朗山道熟食市場嘅青咖喱屋吸引咗唔少住南區嘅捧場客，咖哩炸軟殼蟹配上脆身嘅蒜蓉包，兩者可以話係絕配，燒豬頸肉份量多，燒得啱啱好，肉質爽口唔會太過老。仲有，嚟呢到一定要叫椰青沙冰，即開即挖即打，仲要原個椰青上，解渴一流。
平民價錢 泰國風味 芭提雅
（圖：Foodie Buddies）
另一間同樣位於南朗山道熟食市場嘅泰菜芭提雅，價錢仲要再平啲添。泰式海南雞飯嘅黃油均勻滲透喺飯入面，雞去晒骨，肥瘦適中；泰式乾炒豬頸肉金邊粉夠鑊氣，夾雜蛋絲同菜遠，相當入味。熟食市場嘅環境係雖說無Cafe咁Relax，但係美食當前，價錢仲要咁平民，咩都抵返晒喇。
打工仔午飯食堂 生記食家
（圖：Pinky Pang）
南朗山道熟食市場簡直係南區人嘅福音，裡面唔只有泰國菜，亦有港式茶記。唔少附近嘅上班一族都選擇嚟呢到午餐，當中生記食家就係午市經常座無虛席嘅其中一間。呢到最多人叫嘅係椒鹽豬扒飯，即叫即炸豬扒，外皮炸到金黃色，配上椒鹽嘅辛香口感，再淋埋甜豉油喺白飯上面，慰藉咗唔少打工仔。
文：Dap
其他精選文章推介：
唔同Budget都有！情侶鋸扒指南
喺香港都搵到日本媽媽嘅味道──7間日本家庭式食堂
餃乜鬼咁好食？餃子店大晒冷
隨時接收最新資訊文：Dap
其他精選文章推介：
唔同Budget都有！情侶鋸扒指南
喺香港都搵到日本媽媽嘅味道──7間日本家庭式食堂
餃乜鬼咁好食？餃子店大晒冷
讚好OpenRice專頁！
