香港地扒房選擇多不勝數，諗食邊間都諗到頭痕呀。今次介紹5間畀大家，有美式扒房、啱晒大胃王嘅無限任食牛扒、 價錢親民西餐、酒店高質肉眼扒及工廈抵食扒房，豐儉由人，最重要係間間都咁有質素。
黑安格斯肉眼牛扒+任食薯條 La Moo Moo' s Steak and Fries
對鋸扒有返咁上下要求又唔想太貴，嚟灣仔呢間美式扒房就啱啦。款式選擇唔多，主打呢個$388嘅set menu，必試當然係美國安格斯特級西冷牛扒！包括餐湯、沙律、自家製肉桂牛油餐包同黑安格斯牛扒，餐廳選用美國U.S. Prime等級牛扒，無經過任何雪藏，兩面都塗上牛脂後大火煎香，肉質軟腍好Juicy，而且牛脂味香濃。醬汁方面推介黑椒汁，加入洋蔥、蒜頭、新鮮原粒黑椒及自家熬製嘅牛肉湯，好惹味。套餐仲包埋任食薯條，都幾抵食呀。
圖: RubyWong1122
無限任食牛扒 Porterhouse - Seafood & Steak 
如果你係大胃王，咁就要試下呢間供應無限任食扒類嘅餐廳～呢間扒房逢星期一、二會推出Let’s meat套餐，包括前菜、甜品及無限供應嘅扒類。肉類除咗羊架及豬肋骨，當然唔少得澳洲安格斯側膜橫肌牛扒及和牛肉眼扒，前者肉質嫩滑，後者牛脂味好香濃，而且餐廳都只作簡單調味，所以可以食到原始牛香，食肉獸一定會食回本！
圖: happyleslie3
價錢親民西餐 後街牛扒
一間好講求細節嘅西餐小店。餐廳主打幾款唔同嘅牛扒，當中最推介係呢款荷斯登牛腰扒，牛來自美國頭三甲嘅牧場，牛肉有豐富大理石油花紋，肉味油香濃厚，肉質嫩滑，三成熟啱啱好，主廚將外層煎至焦香，好高水準～另外美國Prime安格斯牛柳都值得一試，係牛肉其中一個最軟腍嘅部位，肉嫩又juicy。
圖: Pleplev3v
酒店高質肉眼扒 HENRY
有特別節日想慶祝想搵高質嘅牛扒，可以試下呢間酒店內嘅扒房。佢哋有配備明火焗爐、炭烤爐及世界級肉類存放櫃，果然係唔同啲。最招牌係45日熟成嘅Porterhouse，份量好大所以比較適合4個人食～佢嘅tenderloin部分處理得好好，好幼嫩，而且成功將牛扒嘅肉汁鎖住，外皮香脆，炭燒香氣好突出～
圖: tiffsuet
工廈抵食扒房 Non Kitchen
位於觀塘工廈嘅高質西餐廳，炭燒安格斯西冷牛扒好有人氣～西冷一切開呈粉紅色，牛味濃郁，而且鹽同胡椒嘅份量落得啱啱好，可以突顯牛味，肉質都好juicy。一個二人set都係$548，包括餐湯、沙律、一份意粉或飯等主食及牛扒，有時想經濟啲鋸扒，呢度係唔錯嘅選擇呀～
圖: Konkon22
