「叉飯就叉飯啦，加隻荷包蛋畀盡你咪廿二蚊碗，黯咩然銷咩魂飯呀？」有睇過《食神》嘅朋友仔，對「黯然銷魂飯」呢道菜式一定唔會陌生，而且，作為香港人應該點都食過「叉蛋飯」。之但係，最近喺炮台山，就有間餐廳主打「黯然銷魂飯」，仲賣到八十蚊一碗！到底有咩來頭呢？
《食神》電影截圖
原來佢哋邀請到香港四大名廚之一，「香港食神」戴龍師傅擔任餐廳顧問呀！戴龍師傅有四十幾年入廚經驗，而且，當年星爺電影入面嗰碗飯，原型就係由戴師傅創出㗎，戴師傅仲有喺戲入面客串演出添，所以呢碗可以話係最正宗嘅「黯然銷魂飯」啦！
雖然一碗黯然銷魂飯材料簡單，就得眼見嘅叉燒、荷包蛋同飯，最多加埋啲醬汁，但愈簡單嘅菜式，先愈顯得出師傅嘅真功夫。2018版「黯然銷魂飯」，比起廿年前又再精益求精咗。嘅逐樣介紹下，叉燒，用本地豬，仲係揀肉質較細膩嘅梅頭肉去製作。先以50幾度嘅玫瑰露酒去醃製，到燒之前又再落多次，所以食得出好甘香嘅味道。而且製作時冇加色素，只係以醬料同焦糖上色，健康啲、有營養啲。戴師傅強調，為咗令大家食到最新鮮嘅叉燒，唔會全日一早就燒定掛晒喺度，而係每日分5次燒製出爐嘅時間，火喉控制得好，切嗰陣刀功都唔少得。師傅把刀好厚重，手起刀落，每片叉燒厚薄平均，而且肉、脂、腩層次分明，口感鬆化，帶有焦香同蜜香。
至於荷包蛋，係本地嘅初生蛋，蛋白質同營養價值較高，蛋黃呈深黃色，蛋香味濃。
飯亦相當講究。師傅選用嘅係武昌市黑龍江嘅五常米，香港唔多地方有得食到㗎。呢種米相對較有咬口，粒粒分明，每年只係出灶一次，產量只係得普通大米嘅三分之一，好珍貴呢。米嘅比例係七成新三成舊，再混埋少量北美野米，令到本身清香嘅味中滲有微微木頭同茶葉味。
最後要講埋啲醬啦，以天然發酵兩年嘅豉油做基調，加入紅蔥頭，煮好後備用，臨食之前先至淋落去，豆香蔥香同時爆發。
建議返，可以配埋杯法國紅酒，食叉蛋飯原來都可以有好高級嘅享受。
Btw，餐廳除咗呢碗經典飯之外，都仲有其他燒味，例如燒鵝、燒腩肉等，都係皮脆肉嫩。
Chop Chop 食神叉燒
地址：炮台山宏安道18號地下3號舖
文、相：Kar
