識揀，一定揀以下fancy系火鍋店，由裝潢、配套到湯底、配料統統「去麻甩化」，兼力sell健康滋補，至合女生脾胃！
手作 X 窩心 聚手工火鍋
由幾位年輕姊妹洶開設，一室簡約木調子，枱椅擺得疏落，兼設梳化卡位，舒服好坐，至啱girl’s talk。食物以手工、滋補掛帥，如招牌之一的龍骨湯底，用上富膠質的龍躉骨熬足數句鐘，養顏且滿是甜鮮魚香；另杏汁白菜豬肺湯、梭羅魚湯也受女生熱捧。
配料大多自家製，人氣作有松露餃、手工花枝卷、紫薯釀墨魚滑等，配搭賣相皆新派。店主之一曾在澳洲星級餐廳當餅廚，每日炮製西式甜品如雪葩、松露朱古力等，款式天天不同，比一般果盤有heart得多，而且不用轉場也歎到高質甜品，甚是周到。
加分位：通風系統強勁，吃罷不會滿身油煙，女洗手間又放了漱口水和香味噴霧，打完邊爐想執靚靚直落老蘭，一樣ok！
(Photos by 糖小妹 & 愛吃達人 & KiloMeter)
花臣 X Go Green Canton Pot
位處旺角精品酒店薈賢居，裝修骨子，客路斯文。主打健康鍋物，花臣多多，自創天麻雲腿燉雞、川芎白芷魚頭鍋等湯底，必點松菌黑虎掌菌湯，菌味芳郁，柯打集日本雞油黃菌、黃耳等九款菇菌的拚盤同吃，名副其實全菌宴，至啱素食者。
落本用北海道粟米、有機白蘿蔔等靚蔬果，肉類則推介本地新鮮牛頸脊和包入西班牙黑豚的羊肚菌餃。醬料超多花款，海皇醬、馬來海鮮醬乃自家炒製，惹味！飲品可揀洛神花茶、紫背天葵等，清潤解熱；最後以燉雪梨等甜點作結，由頭潤到尾。另設一人前套餐，出動High tea架盛載火鍋料，fancy到不行。
加分位：除主餐區之外還有7間VIP房，間隔可靈活調動，部分更設有唱K設施，私隱度高，適合大班姐妹搞聚會或開P用
(Photos by four_month & 食神son & T.LAU914)
名班底 X Fine Wine 寶哥火鍋味館
火鍋界老大哥，兩年前殺入佐敦開三層旗艦店，換上清雅的米黃主調，開揚闊落。樓上兩層主打火鍋，地下則闢做酒窖，供應400多款來自法國及新世界的酒品，並請來廿年經驗的品酒師駐場，專職為客人做wine & food pairing，相當破格。
廚房班底出身自西苑，選材嚴謹，刀功也好，香蕈牛肝菌清湯、番茄牛尾湯均足料味鮮。別錯過其牛肉，除了佐賀和牛，還有澳洲M12霜降和牛；豬肉則備有豬翅筋、豬脆骨、豬肚尖等刁鑽部位。另自設大型魚缸，奉上大珍珠躉、法國藍龍蝦等即日鮮。
加分位：酒品由平至貴皆有，其中80款更是獨家貨色，不論初哥或資深酒徒都有得揀，摸著酒杯底和姐妹談心，份外有feel
(Photos by Darren Lam & 榴槤熊)文：Fi
