心水清嘅酒鬼朋友，應該會計到就嚟又係各大啤酒節嘅日子，又可以趁機盡興飲多兩杯。喺9月尾率先就會有全港最大型嘅手工啤酒節Beertopia，而家已經開始賣緊飛啦，即刻睇下有咩飲有咩食先~

今年嘅規模比往年更大，總共有25間特色餐廳同美食車嘅美食。例如有Fat Legs’ BBQ嘅自家製泰式熱狗，用咗青檸汁、香茅、辣椒嚟調味，唧埋蛋黃醬，係幾香口嘅。

當然唔少得佐酒必食嘅串燒啦，Kitute’s Brazil提供嘅係巴西風味嘅牛肉同雞肉串燒，另外仲有芝士控大愛嘅芝士脆皮球，呢個要趁熱食呀，脆皮包住嘅係半熱溶芝士嚟。

另一間有串燒食嘅係Pololi，有椰子青檸蝦同雞肉串，啲蝦剝晒殼，好方便！粟米脆片同樣適合送酒，有枝豆x鷹咀豆x紅菜頭製嘅紅綠千島醬點。

嚟多條酒後雪條都仲得，呢幾款手工雪條，除咗用新鮮果汁製之外，都有酒嘅成分㗎，正呀喂。白/紅Sangria呀、西瓜清酒呀、金巴利香橙呀咁，選擇困難症好易發作。

而主角，即係手工啤酒，就更加會超過500款，當中有87款就係本地釀製嘅，例如大家都好熟悉嘅Heroes、常陸野貓頭鷹、門神、少爺麥啤等等，到時都會有新嘅酒款launch，Lion Rock亦已透露屆時將會有隻「紅唇烈焰」嘅果酒新推，而8月先新出嘅「一路好酒」在場都有得買，粉絲記住留意喇。

其中率先介紹下門神嘅會場限定先~ 八仙果天朝棕艾，特別版嚟㗎。喺煮麥芽同啤酒花呢個步驟嗰陣，就已經加入埋一粒粒嘅八仙果一齊煮，煮到溶晒，所以飲出嚟嘅八仙果味都好突出。聽講到時仲會有隻新嘅Imperial Breakfast Stout糖漿黑啤添。

至於少爺麥啤，亦會有多款新酒。其中，用咗多種啤酒花釀造嘅壹仟，唔好畀佢IBU100嚇親，飲落其實果味幾香，幾易入口。另外，黑無常系列同樣值得一試。女生可選raspberry口味，而愛刺激者可選stout imperial呀，後者喺釀造過程中加入辣椒乾，aftertaste會慢慢滲返啲辣味出嚟，就算食得辣嘅朋友都未必可以一次過乾咗佢呀！

黑鳶亦有兩款新推出嘅手工啤，分別係Beer Rendang同Golden Ale。Beer Rendang幾特別，係款辣辣啤酒嚟，堅係用咗辣椒呀、薑呀同其他印尼香料去釀造，飲到落喉嚨就會feel到啲辣喇，刺激仔。

至於Yardley Brothers就有幾款得獎手工啤介紹返，HK Bastard Imperial IPA都幾唔錯，酒體醇厚，有微微甘苦，女生怕苦嘅就可以試Framboise-Raspberry Sour Beer，酸酸地，紅桑子嘅味道幾清新。

而嚟自意大利嘅Seta Special Wit – blanche Seta Special都係今年新出嘅啤酒，特別在於內含芫荽呀！！！科科，澀澀地係正常呀，但連埋香檸檬皮係幾fresh嘅。而BAV嘅Matrioska Russian Imperial Stout相當珍貴，全場限量12支咋！事關呢隻酒係厚身黑啤底嚟，但放過喺威士忌酒桶5個月㗎，麥芽同苦澀味做得幾平衡，亦滲出陣陣木香。

介紹多隻感覺light啲、易入口啲嘅酒畀女生先~~Red Mill Ltd嘅Pasteur Street Passionfruit Wheat Ale，黃色罐裝嘅，幾sharp應該好易spot out。越南嘢嚟，百香果味，甜甜地，同一品牌另有茉莉花、朱古力咖啡等口味。

值得留意嘅係，今年仲新增咗兩大區：「蘋果酒區」（Cider Area）同「啤酒怪胎區」（Beer Geek Area）。前者會有唔同口味嘅蘋果酒，而後者就會有啲特色兼限量嘅啤酒。

詳情
《第六屆香港國際手工啤酒節Beertopia》
日期及時間：
9月22日（五）：6pm – 11pm
9月23日（六）：12nn – 11pm
地點：中環海濱活動空間
詳情按此  www.beertopiahk.com

文、相：Kar