平時喺市區多，其實離島都有唔少好嘢食選擇㗎～今期搜羅咗南丫島5間美食餐廳畀大家，假期或週末去玩時都可以享受美食。

悠閒西式cafe 南島書蟲

圖：angelina1105

一間食物口碑好好嘅西式餐廳，成日都大排長龍㗎～餐廳菜品選擇唔多，但食物質素都有保證。必食香濃蝦汁海蝦意粉，海蝦新鮮彈牙，蝦汁用咗蝦頭、蝦殼、蝦粉等熬製而成，好濃厚，非常掛麵，每一啖都係滿滿嘅鮮蝦味。香蒜白酒蜆意粉乾身唔油膩，一入口蒜香、酒香同埋蜆嘅鮮味撲鼻而來。最後要試埋芒果芝士蛋糕，蛋糕表面淋上香濃芒果醬，入面係酸奶芝士同芒果肉，味道酸酸甜甜清新解膩。

南丫海角海鮮餐廳 南丫公館

圖：yoyochocolate

新派海鮮餐廳，有別於傳統海鮮大排檔，裝修精緻走休閒風格，仲有無敵大海景！餐廳負責人都係漁民出身，對於海產採購有豐富經驗。索罟灣魚湯以新鮮白肉魚熬製而成，配上蘿蔔同豆腐，鮮魚味突出。花雕雞油蒸馬友都好推介，採用南丫島本地新鮮馬友製作，馬友魚嘅鮮味同花雕酒嘅甜味融合原來咁夾。另外椒鹽鮮魷、鮮鳳梨咕嚕肉同招牌漁夫蒸飯都值得一試。

渡假風墨西哥小店 Los Gangstas Restaurant

圖：YummyTummyJimmy

氣氛幾chill嘅墨西哥小店，老闆雖然唔係當地人，但好鍾意墨西哥，所以好努力鑽研墨西哥菜，味道都好地道。Los Gangsta Nachos分量十分之大，粟米片畀滿滿嘅芝士同番茄醬覆蓋，再配上sour cream同牛油果醬等，啱晒一班人share！Picadillo (Beef) Burrito內餡豐富，牛肉香濃又juicy，一啖入口好滿足。

地道港式小食 蔡記小食

圖：Pleplev3v

行行吓想坐低休息食小食，呢間主打港式小食嘅茶檔就啱晒，供應一般粉麵同小食～推介佢哋嘅煎韭菜餃，$30/6件煎餃，每隻都大大件，相當抵食，仲好惹味多汁呀。煎雞翼店員用鐵板即叫即煎，兩邊煎到色澤金黃，嫩滑多汁；煎釀豆腐魚肉彈牙得嚟有淡淡嘅蔥香。想飽肚都可以整返個粉麵，好似牛雜麵等都幾唔錯。

有緣先食到 金卷食品

圖：Shanccs

想買手信嘅推薦呢間出名鳳凰卷嘅店舖，鳳凰卷皮薄同時鬆脆可口，每一件都係人手製作，好有誠意。有肉鬆同椰絲味，肉鬆好惹味，椰絲都好足料，想買嘅提提大家記得打去訂，因為唔係成日有現貨㗎。

文：Yanica
編：Cathy