隨住4.21開始放寬返嘅防疫措施，之前打卡大熱嘅西九M+博物館都可以重新開放，而且重喺臨近海旁嘅位置，開多咗間成萬呎嘅餐廳添。新餐廳ADD+係「All Day Dining」嘅縮寫，即係全日餐飲都有著落，朝九晚十。另外更有戶外用餐位置，可以眺望西九藝術公園同埋維港天際線景色，吹下海風咁，好鬼chill。

餐廳Menu非常豐富，由香港經典小食、中式點心到全球料理都有供應，一家大細男女老幼嚟到都實揀到各自嘅心水。好似中式點心咁，有個九宮格嘅粵點盛盒，入面9款都係精心設心、融合中西日等文化嘅新派點心，例如燒賣就加咗日本櫻花蝦同蟹籽喺面、春卷又加入鰻魚同紫菜，另一款春卷則好似西餐咁選用牛頰肉製作，外脆內嫩。其餘特色點心包括杞子醉雞餃、蜂蜜柚子蟹肉蝦餃、鮑汁海參滑雞扎等。

腸粉亦變奏成煲仔沙嗲牛肉炒腸粉，沙嗲醬係師傅自家秘製嘅，將蒜粒、乾葱、沙茶醬炒香後，最特別係會加入新鮮栗子蓉慢炒，令到汁醬變杰身，同時帶有甜香。

海南雞飯則係灣仔某高級酒店著名海南雞飯嘅改良版，製作頗花心機。先以金華火腿、大地魚、冬菇、乾瑤柱同八角等材料製成雞湯底，將原雞隻浸熟，然後又再放入蒸餾水加冰粒中冷卻，使之保持嫩滑嘅肉質，最後再用高速冷凍方法浸多次隻雞，令雞皮都上埋味。

呢度唔止地方大過人，連三文治都巨過人！公司三文治有成18層餡料同醬料，打完卡之後都會頭痕，應該點食至好？畀啲貼士大家，師傅建議大家可以由頂層開始慢慢食到底層，以頂層新鮮creamy嘅牛油果，同酸甜嘅芥末籽做start，有種食沙律嘅感覺。一路食就會食到雞肉、火腿、流心蛋、牛肉片等，混和咗蜜糖、蛋黃醬、黑松露醬等醬，慢慢由淡味食到濃味，層次豐富。麵包則主要係酸種麵包同wine bread嘅混合，再經過燒烤爐燒過，帶有陣陣炭香。不過份量都真係幾大，多幾個人share先得。

至於招牌菜，不能不數每日限量50份嘅香炒鵝油叉燒意大利粉。叉燒採用本地梅頭肉製作，每日新鮮煉製鵝油，炒好後放入高溫袋內以180度焗10-15分鐘，留待喺客人面前先至即席剪開，油香隨即飄出，食慾大增。

最後介紹一下雞蛋仔，4款口味包括原味、芝麻、士多啤梨同伯爵茶，仲可以揀雙色，一次過食到2隻味添。雖然$48一底感覺有少少貴，但一食就食得出係用靚嘅日本雞蛋整㗎，蛋味好香，外脆內軟綿，同埋就算放耐少少，都依然保持微脆同挺身。其餘用料亦嚴謹處理，好似士多啤梨味咁，就以熟透嘅士多啤梨再加酒煮香製成。雞蛋仔堂食又得，外賣拎出西九海旁野餐亦可。

飲品方面，酒精同非酒棈飲品均有供應。想消暑嘅話，凍桃香茶就啱晒，混合咗桃、柿、香茅、橙皮、紅加崙子等材料製作，果香十足。另外，經典雞尾酒Jan’s Collins則加入清新嘅熏衣草糖漿調配，帶有春夏嘅氣息。

ADD+
地址: 尖沙咀西九文化區博物館道38號M+ B1層

文、相、片：Kar