除咗譚仔同海底撈，鍾意麻辣嘢仲可以食啲咩？四川菜絕對係一個好選擇！川菜喺香港越嚟越流行，無論正宗定新派川菜都開始進駐香港，無辣不歡嘅你一齊睇下香港有咩必試川菜啦。
破格新派 川流
一間走型格路線嘅新派川菜餐廳。餐廳裝潢破格，外牆全黑，室內佈局似一間非常有格調嘅bar，將創新意念注入傳統四川菜入面。佢哋嘅醋椒胡辣羹以被稱「胡椒之王」嘅柬埔寨貢布胡椒調味，味道濃郁帶花香；52度慢煮樟茶鴨胸就結合咗西式慢煮手法同傳統章茶鴨做法，以52度慢煮鴨肉3小時，再焗脆外皮製成。其他特色菜式包括33香辣雞鍋、燈影牛肉、當紅沸騰龍躉鰭、蒜泥白肉涼拌手工凉麵等，另外仲有獨創辣味cocktail同麻椒香子蘭意式雪糕。
辣味指數：🌶🌶
辣味多變，重點在於辣味嘅香。佢哋菜單入面都有好多唔辣嘅特色菜，適合想淺嚐四川香辣嘅朋友。
辣得滿足 麻辣派對
麻辣派對提供嘅菜式分4大類，分別係水煮、酸菜、香辣鍋同酸辣鍋。主打嘅香辣鍋，以炒香嘅辣椒乾、香辣醬、大蒜、薑、葱燜煮，配以花椒、八角、桂皮等其餘13種配料，味道濃郁，辣味十足。香辣鍋可選麻辣雞鍋、香辣豬手鍋、麻辣肥腸鍋等，仲提供20幾款配料畀大家任意配搭。
辣味指數：🌶🌶🌶🌶🌶
麻辣派對嘅香辣鍋用料十足，辣椒鋪滿成個鍋，辣味好出。可以選擇辣度，但小辣已經十分強勁，嗜辣者可以挑戰中辣、大辣。
獨調辣油 井巷子
超正宗成都風味川菜，當中嘅招牌菜成都青湯水煮魚用上四種唔同青辣椒、青城花椒同大紅袍花椒等，連同豬肉同豬骨熬煮成湯底，辣味帶強烈麻香。餐廳又會以青花椒粉自家炮製辣油，用嚟炒香雞雜製作雞雜擔擔麵。其他特色菜式仲包括以日本米酒浸泡過嘅雲南皺皮椒酸菜辣肉醬扒鴨血、豆酥椒鹽有機舞茸同手抓羊肉配雙太陽卵飯，每道菜所用嘅香料都經師傅精心調配㗎。
辣味指數：🌶🌶🌶
成都風味注重麻、辣、鮮、香之間嘅平衡，辣味突出而有層次，特製青花椒粉辣油辣味十足，食完條脷會麻麻地。
惹味酸菜魚 十二味
呢間川菜店喺香港有八間分店，西環呢間係旗艦店，室內設計走現代中國風，主打酸菜魚同麻辣香鍋。呢度嘅酸菜魚用上二十個月雲南老埕酸菜、四川酸菜同廣東鹹酸菜炮製，酸甜爽口，而鱸魚肉質嫩滑、無骨，可選辣同唔辣。麻辣香鍋就有25款配料選擇，配上秘製香油同12種由成都直接運嚟嘅香料乾炒而成。
圖: noknokyuen, m92342005
辣味指數：🌶🌶🌶
酸菜魚同部份小菜可選擇辣同唔辣，麻辣鍋有一定辣度，但辣得嚟唔灼喉。
特色冒菜 烏蠅館
主打冒菜，係四川成都嘅特色菜，同麻辣燙相近，但油份較少。湯底以黃油、芥花籽油同三種辣椒熬煮而成，入口辣而不麻，仲有40款配料任揀。晚市就主打三峽烤魚，以長江三峽地區傳統烤魚方法製作，採用秘製香料炒製同醃製，味道香得嚟唔會淨係死辣，不過份量唔算好多，多人一齊食可以加多啲配料。
圖：Owl24
辣味指數：🌶🌶
冒菜比較辣，小辣嘅辣味已經好出。而烤魚可選辣度，唔食得辣可以揀蒜香烤魚，一樣惹味。
文、相：Kenna