潛行觀塘另類空間——工廈餐廳

以前去觀塘食飯，淨係識喺啲大型商場裡面搵食。不過，近年開始，轉場噜，轉去啲工廠大廈。係就係感覺舊咗啲、殘咗啲、靜咗啲（尤其夜晚），但呢啲都只係限於你由地鐵站行到去幢大廈入口嗰陣嘅感覺，搭咗轉𨋢，入到間餐廳你就唔係咁講嚕，直情好似去咗第二個空間咁。「嘩，估唔到工廈入面都有西餐食喎。」「入到嚟裝修又幾靚喎。」有時啲嘢，行多步，就好唔同㗎喇，而家就幫你哋行多幾步，介紹幾間藏身喺觀塘工廈入面嘅餐廳啦。

情調西餐　　i kitchen

Photos by much168 & sunflower123
i kitchen燈光偏藍調，暗暗地幾有feel，完全唔覺得喺幢工廠入面，環境分嚟計成功過關。食物嘅水準亦都相當唔錯，揭開餐牌都見到幾多有特色嘅菜式。前菜首選北海道甘蝦伴蘆薈沙律，個沙律清淡得嚟又唔會淨係得菜，除咗有蘆薈粒咬下口，最開心係有隻都叫大隻嘅甘蝦食下，蝦肉仲好彈牙好新鮮，健康得嚟都可以享下口福，heehee。

講到特式，就當然要提下威靈頓紐西蘭牛柳，上碟嗰陣你淨係見到個包，見唔到牛柳係正常嘅，千祈唔好以為佢嚟錯，因為塊牛柳就係畀個脆卜卜嘅酥皮包住咗，啲肉汁被鎖住咗，更加有牛味！而黑魚籽鮮蝦忌廉蛋就將隻蛋挖空，得返啲蛋白再加入忌廉同墨魚籽，好考功夫㗎，仲要超滑囉好冇？仲有好多聽到個名都好想試嘅嘢，例如煙燻三文魚伴血橙羊奶芝士火箭菜同北海道刺身帶子黑松露意大利飯等等！不過一分錢一分貨，呢度價錢當然都有返咁上下啦，係西餐價唔係工廠價囉。

停車場內的澳洲菜　　Bondi

Photos by Beanie Foodie & Hunter115
呢間餐廳，比其他工廈餐廳更加估唔到嘅一個位係，佢嘅位置係喺工廠嘅停車場入面！如果喜歡旅行嘅朋友可能都會知道Bondi係澳洲嘅一個沙灘，而喺呢度食到嘅，就係融合埋東南亞風味嘅澳洲菜嘞。

其中，野菌豬手肉釀雞卷配西梅汁接近係必試嘅菜式，上碟嗰陣見到啲嘢食一層疊住一層，雞卷米通雞卷米通再放埋秋葵，好似玩層層疊咁疊到都幾高。睇落有層次，食落一樣有！啲豬手喺邊？咪切碎釀咗入啲雞脾肉卷度囉，仲夾埋野菌㗎，再淋埋酸酸甜甜嘅莓汁，一啖食到四種味，豐富得嚟又幾夾。仲有啲脆卜卜嘅米通同甜甜地嘅棉花糖伴住，雖然細細嚿，但我都淨係覺得自己畀美食包圍咋！

減肥剋星　　魔膳工房

Photos by moey & karcc
呢間餐廳，正餐同甜品都一樣咁吸引。先講佢個極上和牛漢堡配薯角，個burger都算大，塊和牛又夠juicy，夾埋芝士煙肉生菜蕃茄一齊食，係要放開少少儀態，用隻手揸住再擘大啲個口嚟食㗎喇，咁先夠風味嘛！而且，薯角點嘅唔係茄汁，係沙律醬，酸酸甜甜咁。

至於甜品，有個大大份嘅黑松露焦糖燉蛋，黑松露香得嚟又唔搶咗燉蛋嘅味，連埋脆卜卜嘅焦糖一齊食，好sweet池，減肥呢啲咁掃興嘅嘢就咪講啦！仲有quota嘅就食埋個朱古力mousse啦，好濃嘅朱古力味就唔使講，特別在於佢唔係成嚿都軟腍腍㗎，中間有塊朱古力脆餅，幾有口感。

必食窩夫　　Bold Italic

Photos by LaurieR & maymay501hk
如果你嚟呢間食，建議記得留肚食呢度嘅窩夫。呢度有個香芒藍莓窩夫，甜甜der，烤焗過真係做到外脆內軟，不過重點係個窩夫溝埋咗啲綠茶一齊整，有淡淡嘅綠茶味㗎！又，如果你夠勇，喜歡挑戰新事物嘅，就可以試下一個超新鮮組合——煙鴨胸菠蘿芝士窩夫伴沙律！塊窩夫上面堅係疊住幾嚿菠蘿同鴨胸，仲有埋糖醬，又鹹又甜係特別嘅，試完記得要影相加upload呀，實呃到like（應該係）！

觀塘罕見甜品店　　ACOCake

Photos by annielwy & JamTea
觀塘雖然都尚算多嘢食，但甜品店就得好少，呢間有cupcake雪糕賣嘅甜品店都算係綠洲之一。我冇打錯，係cupcake雪糕，一樣嘢嚟，同一隻杯裡面又有cupcake又有雪糕，仲有蝴蝶酥、焦糖夏威夷果仁、腰果同忌廉芝士喺側邊，係吸引嘅。雪糕同cupcake每日都有唔同口味揀，客人可以自己自由配搭又得，揀完雪糕口味再交畀大廚發板個cupcake配咩味都得。好彩嘅嗰日咪有抹茶味、豆腐味呢啲好多人都心心眼嘅口味囉，有時仲會有荔枝、榴槤味等等添。Cupcake都有香蕉呀竹炭黑芝麻等等嘅味揀。呀，講漏咗，啲雪糕面仲會有海鹽焦糖醬㗎！不過如果你冇咁多quota嘅，就咁食一個cupcake都一樣有好多款畀你揀！

文：Kar

隨時接收最新資訊
讚好OpenRice專頁！