接近成年冇飛過喇嗚！但亦因為咁，今年好多人都去多咗香港唔同嘅地方「本地遊」，而山頂就係其中一個熱門郊遊同行山嘅景點啦。最近新開咗間主打傳統意大利家庭風味嘅餐廳，由意籍米芝蓮星級廚師主理，仲設有戶外座位添，喺附近玩完嘅朋友可以去探探路呀。

餐廳有多款菜式選擇，當中又以海鮮為主。前菜烤西班牙八爪魚配香辣蕃茄醬，係成條粗壯嘅八爪魚鬚上碟，賣相吸引。八爪魚鬚煮熟後再烤香，所以食落味道都帶有微微嘅焦香，點埋由蒜頭、番茄、紅椒、橄欖油煮成意大利香辣茄醬，鮮甜味更突出。

另一款開胃前菜係布拉塔水牛芝士，配埋經過5至6個鐘風乾而成嘅自家製羅勒麵包粒、帶果香嘅意大利橄欖，同埋多款唔同口味嘅蕃茄，清新得嚟又有濃郁奶香味。

想一碟就食到多款海鮮嘅，要揀龍蝦湯海鮮燴飯。師傅特地選用來自意大利北部嘅意大利米Acquerello，連埋西西里紅蝦、帶子、青口、魷魚同埋龍蝦濃湯等煮成。鮮味係幾足嘅，但可惜略為鹹咗少少。

海膽烏魚子意粉啲意粉係選用意大00麵粉新鮮自家製，烏魚子都用咗兩款，仲好fusion咁放埋日本海膽，記住要撈勻先食呀，咁先會食到啖啖鮮香感覺。

鍾意食魚嘅朋友，有地中海蕃紅花煎鱸魚配西蘭花，外皮煎到脆脆地，肉質嫩滑。

至於甜品方面，好明顯唔係行外貌協會嘅路線，而係重視內涵。意式奶凍配野莓醬加入天然魚膠製作，奶香十足之餘，口感仲特別軟滑。

 Cocktails及Mocktails

Fiamma By Enrico Bartolini
地址: 山頂山頂道118號山頂廣場地下G02號舖

文：Kar
相、片：Tom Li