今年母親節適逢佛誕假期，一家人放假最啱一齊去食自助餐！一嚟媽媽唔使煮飯可以休息下，二嚟自助餐選擇眾多可以滿足晒一家大細唔同口味同需求。今年唔少自助餐以香港人最愛嘅海鮮做主題，亦有加入養顏甜品作招徠嘅。部分仲有早鳥優惠，唔好錯過啊。
海膽鮮蟹盛宴 Three on Canton
尖沙咀呢間酒店餐廳最近推出以蟹同海膽做主題嘅自助餐，每晚都有四款鮮蟹：鱈場蟹、石蟹、日本毛蟹同麵包蟹，星期五至日仲加埋加拿大嘅阿拉斯加帝皇蟹！另一主角海膽就變成海膽蒸蛋白、海膽醬三文魚籽玉子燒、海鮮海膽炒飯、海膽手卷等美食，每款都各有特色。
豐蟹海膽自助晚餐
供應日期：即日起至2019年6月30日（18:30-22:00）
價錢：星期一至四成人$658/位，小童$398/位；星期五至日、公眾假期及前夕成人$688/位，小童$428/位
有機虎蝦+矜貴花膠 City Café
呢間位於油麻地嘅酒店餐廳就主打花膠同虎蝦，首先5月11號同12號每位都有一客碧綠鮑魚拼花膠，其他回本必食包括花膠香芒莎莎琵琶蝦咯嗲、鴛鴦胡椒炒虎蝦、花膠鮑螺絲羮。12號仲有廚師會即場教大家整士多啤梨拿破崙餅，加上裝飾就係獨一無二嘅母親節禮物啦。
花膠‧虎蝦‧海鮮自助晚餐
供應日期：即日起至2019年5月31日（18:30-21:30）
價錢：星期一至四成人$468/位，長者$388/位，小童$288/位；星期五至日及公眾假期成人$488/位，長者$408/位，小童$288/位
*以上價格需出示OpenRice優惠券（條款及細則），每位媽媽於5月11日至12日可獲贈「閃爍香皂花」禮品一份
日式海鮮美食 中西∙環
集港人最愛嘅日本菜同海鮮，西環呢間酒店嘅自助晚餐係無得輸嘅。推介包括日式爐端燒、時令刺身、即叫即製嘅拉麵等等。冰鎮海鮮就有波士頓龍蝦、鱈場蟹腳、紐西蘭青口等。而且5月11日至12日仲會增加以蜜糖入饌嘅項目，好似醬燒蜂蜜松板豬、日式蜂蜜千層蛋糕等。
「味歷東瀛」海鮮自助晚餐
供應日期：即日起至2019年6月30日（18:15-21:30）
價錢：星期一至四成人$438/位，小童及長者$298/位；星期五至日、公眾假期及前夕成人$478/位，小童及長者$338/位
*2019年5月7日或之前預訂並全數付款可享85折，詳情請上酒店網站查詢，每位媽媽於5月11日至12日可獲贈「蜂蜜夜香花海底椰雪蓮燕窩燉木瓜」一客
豐富海鮮+養顏甜品 The Place
旺角呢間酒店嘅自助晚餐供應一系列海鮮同肉扒，包括即開生蠔、菲達芝士焗龍蝦同即切美國頂級肉眼扒。不過對於媽媽嚟講，最吸引嘅係以滋補養顏為主題嘅甜品！好似原盅海底椰燉燕窩，同杞子桂花糕，各位媽媽同囡囡記得留返個甜品胃慢慢享用啦。
母親節自助晚餐
供應日期：2019年5月12日（首輪17:15-19:45，次輪20:15-22:45）
價錢：成人$698/位，小童及長者$498/位
*首100位網上訂座及付全數可享85折，詳情請上酒店網站查詢，每位媽媽於母親節當日可獲贈英格蜜兒禮品護膚套裝一份
芒果紫薯甜品任食 倚窗閣
尖沙咀呢間酒店餐廳嘅母親節自助餐有齊即開生蠔、海鮮、刺身及同即切烤肉，回本必食期間限定嘅鹿兒島和牛，同以養顏燕窩入饌嘅菜式。母親節仲特別加推一系列芒果同紫薯甜品，而5月12號母親節當日每四位客人仲有3/4磅「芒果紫薯蛋糕」一個，蛋糕錢都慳埋！
母親節自助晚餐
供應日期：2019年5月11日（18:00-21:30）及12日（17:30-21:00）
價錢：5月11日成人$648/位，小童$448/位；5月12日成人$698/位，小童$498/位
*另設eShop優惠價，詳情請上eShop網站查詢
文：Cathy
