講咗開店有一段時間嘅新加坡天天海南雞飯終於有新消息，餐廳將於4月上旬開業啦！雖然舖頭仲未有得睇，不過開飯仔率先訪問餐廳大廚，睇下究竟呢個過江海南雞飯有乜咁巴閉先！

將「天天」品牌引入香港嘅老闆Charles本身都係「天天海南雞飯」嘅粉絲，一年都會飛幾次去新加坡專登幫襯，所以好想將品牌引入香港，令好多鍾意食海南雞飯嘅香港人可以品嚐到。

食過海南雞飯嘅都知，材料睇落不太複雜：海南雞、飯、醬料及湯水，齊晒！但親眼睇過廚師由煮雞煲飯去到斬雞上碟整個工序，花嘅心機非常多。首先，將雞隻放入滾起嘅雞湯之中，再放入鹽、冰糖等調味。雞湯內有薑、蒜、鹽、醬油等，而採用嘅雞隻必須係2公斤以下，太肥容易煮得「口鞋」口，太瘦又無乜肉食。

廚師仲透露，雞隻放入雞湯之前，會先拎住雞頸，將雞隻浸入熱湯中，然後迅速拎起，並重覆動作3次。點解咁做？師傅話此舉可令雞隻受熱平均，嫩滑度就更能拿捏得宜。

餐廳總廚指，每一次會放入40隻雞，然後煮約30分鐘。關火後繼續讓雞件留喺湯水中約25-30分鐘，讓雞隻吸收湯味，然後將雞隻放入大量冰粒之中。

經過用冰水收縮嘅雞件口感嫩滑，雞味甚濃，加埋微鹹嘅秘製醬汁，perfect。

另一邊廂，以雞湯煮成嘅黃油飯要出場啦！一般餐廳只會喺白飯中加入黃薑粉，但天天就會用煮雞剩下嘅雞湯精華去一同煲飯，令飯粒亦充滿濃郁嘅雞味。

1碟海南雞飯大約會有四分一嘅雞件，而上碟前廚師更會淋上雞汁加強味道。

同新加坡總店一樣，除咗一份份，海南雞可選一隻分量架！

醬料方面，有新加坡出產嘅濃稠黑醬油、辣椒醬及薑蓉醬。辣椒醬係由天天自家製，酸辣之中又帶少許甜味，好醒胃。

除咗天天海南雞飯，同場仲有3間曾獲米芝蓮推介嘅新加坡實力食店：老街坊、超好面及五十年代！老街坊有3、40年歷史，係星洲嘅人氣平民食堂，主打以秘製黑磨豉醬煮成嘅牛腩牛筋麵，而且可跟配黑松露雜菌醬或自家製XO醬，仲有碗豬骨清湯添！

而另一間麵家「超好面」喜愛fusion煮法，將日式拉麵同廣東雲吞麵融合，成為豐富嘅「超好面」。配料有以西班牙豬慢煮而成嘅叉燒、雲吞、日式溫泉蛋、薯絲炸蝦等等。

有咁多美食，點少得飲品解渴呢？五十年代主打南洋奶茶、咖啡，南洋奶茶味道好似港式鴛鴦，奶味香濃；至於咖啡，店子選用混合咖啡豆，並以南洋炒豆方法，令咖啡豆好香。

另有清新凍檸茶及豆腐花。

以新加坡有名咖椰醬及牛油而烘焗而成嘅咖椰多士。

天天海南雞飯
地址：銅鑼灣Fashion Walk京士頓街9號H2舖
開業日期：4月上旬

文：Joy