香港之所以咁多人鍾意掃街，都不外乎因為夠快夠方便，行過見到想食嘅嘢，買完可以即刻邊行邊食，繼續搜尋下一樣美食。但以往如果你睇中嗰樣係蛋糕，睇怕都幾難可以邊行邊食嘞。不過而家可以喇！有間戚風蛋糕專門店，最近連開兩間新舖，其中一間仲出咗「戚風蛋糕三文治」，食住蛋糕都可以行街街喇~~

旺角店：戚風蛋糕三文治

戚風蛋糕三文治係朗豪坊分店限定嘅，幾種口味包括：士多啤梨、日本柚子、宇治抹茶、栗子、earl grey、雲石意式芝士同雙重朱古力。

其實都係戚風蛋糕口感嚟嘅，鬆軟、綿密，不過就變咗三文治咁嘅樣，中間夾住日本農場直送嘅鮮忌廉、果肉或者朱古力等，拎上手就食得，好方便。但就真係要小心啲拎呀，因為太鬆軟嘅關係，好易跌。

中環店：火紅戚風蛋糕系列

至於火紅戚風蛋糕系列，就得中環店先有，鍾意食紅桑荔枝、紅莓香檳或者洛神紅瑰味嘅朋友就要留意喇！細細個嘅蛋糕，每件都係人手製作，所以每件嘅色差都有些少分別。中間嗰層唧滿cream，連埋輕盈軟綿嘅蛋糕一齊食，感覺都唔會太heavy。

每個蛋糕仲會有獨立一個嘅圓頂玻璃高瓶蓋住，視覺效果當然加分，但更重要係咁樣可以保鮮得好啲。

La Famille
旺角店地址：旺角亞皆老街8號朗豪坊商場B2層1A號舖
中環店地址：中環港景街1號國際金融中心1樓1019C號舖

文、相：Kar