呢間以旅遊為主題嘅咖啡館相信唔少文青同偽文青都唔會陌生，最近各間分店將會陸續換上新形象，首先係尖沙咀店。集旅遊、漂書、未來的信三大理念之餘，仲繼續同台灣咖啡大師林東源合作推出創意咖啡，加入爆谷、花生醬、黑糖等唔同元素撞出驚喜！
 

牧羊少年咖啡館尖沙咀店日前完成Rebranding重開，無論裝修、Menu、飲品等等都換上新形象。咖啡館亦同奪得首屆台灣咖啡大師比賽冠軍嘅林東源合作，以台灣GABEE嘅咖啡豆創作四款創意咖啡，而且會半年至九個月更換款式呀。
 

爆谷咖啡（$62，跟餐+$36）

咖啡帶有朱古力風味，所以呢款配搭雲呢拿糖漿、奶泡、爆谷同焦糖海鹽醬嘅爆谷咖啡，對於平時少飲咖啡嘅朋友嚟講都會相對易入口。奶泡令咖啡口感綿滑，雲呢拿甜香適中，而焦糖海鹽醬加上爆谷增添香脆口感同味道層次。
 

花生風暴（$62，跟餐+$36）

另一杯同樣有玩味嘅推介係以咖啡、鮮奶、忌廉、朱古力醬，同花生醬打成嘅花生風暴，沙冰打得夠幼細，同時又保留少少粒狀口感。花生同朱古力係最佳拍檔，再加咖啡味道更為香醇。
 

薑燒黑糖拿鐵（$58，跟餐+$36）

開飯仔私心推介，香滑Latte當中加入薑蓉同黑糖，撒上黑糖霜，再用火槍燒成好似烤成焦糖脆面。聞起嚟有燒烤同薑嘅香氣，而薑嘅微辣同咖啡估唔到咁夾之餘，黑糖嘅甜度又啱啱好。
 

哈利奶油啤酒咖啡（$78，跟餐+$36）

靈感嚟自《哈利波特》當中嘅奶油啤酒，呢度嘅版本就有楓樹糖漿、忌廉、「浪人」手工啤酒同Espresso，最後再唧上一層咖啡氣泡。啤酒同咖啡味道濃烈而平衡，層次非常有趣！最後提提大家因為有啤酒同咖啡氣泡，千祈唔好攪拌杯飲品，如果唔係就會爆出好多泡！
 

紅菜頭木瓜葡萄藜麥沙律（$98）

尖沙咀店一直以嚟最受歡迎嘅菜式之一，中間嘅紅菜頭藜麥顏色搶眼之餘，紅菜頭有豐富嘅維他命同各類礦物質，藜麥就有大量膳食纖維同OMAGA-3，兩款Superfood一齊食就最啱。如果怕紅菜頭有草青味，建議同香甜嘅葡萄、木瓜一齊點埋蜜糖芥末醬一齊食，味道豐富。
 

 

炙燒荷蘭汁豬肉排（$78）

Rebranding後新增唔少小食，好似呢款炙燒荷蘭汁豬肉排就用豬嘅肉眼，特色係脂肪少，肉質嫩滑。煎至啱啱熟仲帶粉紅色嘅時候加上Creamy嘅荷蘭汁，滿足到食肉獸而唔會太膩。
 

泰比素葉炸魚柳（$78）

炸魚柳嘅炸漿加入啤酒，令外皮食落更加酥脆，裡面嘅魚柳亦Keep到嫩滑。加上炸九層塔增添泰式風味。
 

京都春日（士多啤梨窩夫配雲呢拿雪糕）（$98）

窩夫係自家配方，蛋香唔算濃郁但勝在口感外脆內軟。配料非常豐富：新鮮士多啤梨、鮮忌廉、雲呢拿雪糕，同另上嘅士多啤梨果醬。果醬味道自然酸甜，加上微暖嘅窩夫同冰凍嘅雪糕呢個配搭，係無得輸嘅。
 

牧羊少年咖啡館係香港第一間以旅遊為主題嘅咖啡店，多年來更舉辦過唔少文化活動，嚟緊佢哋亦會專注推動旅遊、漂書，同未來的信三個理念。未來的信係指明信片寄賣及代寄服務，可以幫大家一至五年內任何一個指定日子寄出，等未來嘅你收到而家嘅Postcard！
 

同時咖啡館裡面會有各地旅遊書畀大家借閱，Menu亦增加本地文化店介紹，搖身一變成為本土文化雜誌！鍾意睇書嘅朋友亦可以嚟漂書，睇下搵唔搵到你鍾意嘅書啦。
 

牧羊少年咖啡館
地址：尖沙咀河內道18號K11購物藝術館B2樓27號舖

文：Cathy
相、片：Tom Li