號稱全港首間「奇跡之班戟」即將開幕！講緊嘅係嚟自日本嘅人氣班戟FLIPPER'S，28/7就會登陸銅鑼灣，有咩口味揀？有咩特色？點解叫「奇跡之班戟」？開飯仔今日就去幫大家解答以上問題！
 

之所以稱為「奇跡之班戟」，係因為日本FLIPPER'S嘅班戟口感特別輕盈鬆軟，只有奇跡先足以形容咁話喎。銅鑼灣店有九成嘅食材同日本店一樣，包括麵粉同廣島雞蛋，所以大家可以食到日本人口中奇跡嘅口感啦。
 

期間限定總係特別吸引，銅鑼灣新店一樣有Seasonal Menu，就係用咗香甜宮崎溫室蜜瓜個蜜瓜班戟，配埋蜜瓜口味忌廉同特製雪芭，同輕盈得嚟又唔係完全入口即溶嘅梳乎里班戟好夾。
 

想試真啲班戟味道？咁原味班戟就係不二之選，雞蛋香同帶淡淡焦糖香嘅北海道忌廉一齊放入口，係一份甜而不膩嘅享受。
 

抹茶控必揀綠茶紅豆班戟，選用京都宇治抹茶粉，茶香清幽有回甘。加埋日本有幾紅豆蓉同原味忌廉，係最有和風感嘅口味。
 

士多啤梨藍莓香蕉班戟賣相最搶眼，白色忌廉上面有一粒粒紅色士多啤梨點綴，再加埋新鮮藍莓同香蕉片，相機同味蕾同樣滿足。
 

榛子朱古力焦糖香蕉班戟係四款甜味班戟當中最甜嘅，香蕉肉上有焦糖脆皮，充滿空氣感嘅班戟點埋幼滑朱古力醬、榛子忌廉同香脆果仁碎，口感豐富。
 

梳乎里班戟全部都係即叫即製，要特別留意嘅係要用兩支叉分開班戟，而唔係用刀。背後原因係用刀會有機會壓便塊厚身班戟，影響口感。
 

照顧埋各位男士，店裡面同樣有三文魚牛油果班戟同煙肉煎蛋班戟兩款鹹食選擇，用日本全粒麥粉製成，高纖啲自然飽肚啲。
 

最後仲有三款班戟批畀大家Take out邊行邊食，包括楓糖吉士夾心嘅原味班戟批、朱古力班戟批，同用自家製甜酸芝士忌廉配檸檬果皮嘅檸檬芝士班戟批。
 

FLIPPER’S
地址：銅鑼灣軒尼斯道500號希慎廣場6樓i.t blue block
開業日期：2017年7月28日

文：Kar、Cathy
相、片：Cathy