平時gathering飯局諗食咩都已經好頭痕，遇著生日飯局就更加頭痕！通常你問主角想食問，佢都會答你冇所謂。但冇所謂之中，生日飯總不能夠求其，環境氣氛、食物質素、生日驚喜等，通通都係考慮因素。就等開飯仔畀啲建議你哋參考下。同自己重視嘅人慶祝生日，通常都會想佢食得開心，畀貴少少都唔係問題，咁就一於講下去邊食buffet好啦，咩都有得食，夠晒滿足。

生日靚靚畫碟    Mr. Steak Buffet à la minute

圖：shuki cheung、johnchen33

呢間buffet雖然唔係酒店餐廳，但係一樣有好多海鮮壓場呀，長腳蟹呀青口呀龍蝦呀即開生蠔呀通通都有，款式選擇算係幾多，而且都幾新鮮。熟食嘅和牛壽喜燒都唔錯，甜品仲有Movenpick同Haagen Dazs添，連雪糕批都有，開心仔呢？不過揀得嚟呢度同人慶祝生日嘅，通常都係因為佢嘅「心太軟」！事關個心太軟可以畀你自己決定祝福嘅字句同圖案呀，畫低喺便條度再由師傅代勞。又，如果壽星仔女正日嚟食嘅話，就會送多件cake仔呀。

生日免費食蟹   城景閣

佢哋最近呢幾個月嘅buffet，做緊蟹同海鮮主題，如果壽星仔係海鮮迷就啱晒。「沖繩岩鹽照燒皇后蟹腳 伴 日式柚子醋汁」用嘅係阿拉斯加皇后蟹腳，用牛油同蒜蓉燒香，鮮甜中亦帶有海水嘅鹹味。另外仲有花雕蛋白蒸法國蟹、香辣軟殼蟹、堂煮築地蟹皇水蟹粥、北海道帶子松葉蟹肉伴牛油果咯嗲、黑松露蟹肉燉蛋等等，絕對係成餐「蟹宴」嚟。重點係，無論星期一至日邊日去食生日飯，只要夠四位，生日壽星就可以免費食成餐喇~~~

生日送蛋糕    Harbour Grand Café

圖：carykof、蝴蝶結姐姐

有啲朋友仔，生日好著重一定要有蛋糕切，原個嗰隻。之但係食buffet嘅話，通常都係甜品區嘅切件蛋糕為主，邊度有原個喎？呢間buffet就啱晒，lunch buffet定dinner buffet都好，4個人以上嚟食，憑OpenRice嘅優惠券就可以有個生日蛋糕送返畀壽星仔/女啦。而buffet區都好多選擇，就連lunch buffet都有即開生蠔食呀，不過留意返，呢個優惠去到今個月底咋。

生日免費食兼送汽酒     協奏坊西餐廳

圖：micmic148

如果你身邊有啲係下半年生日嘅朋友仔，慶生飯可以諗諗呢間喎。一嚟，佢哋7-9月嘅buffet主題係「龍蝦」，咁就有龍蝦白酒啫喱呀、龍蝦薄餅呀之類嘅龍蝦菜式，二嚟，4個以上嘅成人嚟食，生日嗰個成餐免費之餘，仲可以有支免費嘅汽酒呀，皆大歡喜！

生日祝福牌   露台餐廳

圖：Paul Tongsk、Bravofood

如果想食好西之餘食埋靚景，咁就非半島莫屬喇，五星級酒店嘅氣派！熟食款式相對嚟講比較少，食多幾隻鮮甜嘅鮑魚、翡翠螺啦。至於壽星仔女有冇驚喜收，就睇你訂枱嗰陣有冇講低喇。佢哋每人都會送一客即焗疏乎厘嘅，如果你訂枱講明係生日飯呢，咁就可以落埋柯打寫個生日祝福牌喇。

文：Kar