旅行對於香港人嚟講仲係遙遙無期嘅事，講到以前嘅快閃旅行，一定非台灣莫屬，唔少人都鍾意襯weekend嚟個快閃～去台灣除咗行夜市同打邊爐，食早餐店都係指定行程之一，餡料超豐富嘅台式吐司仲特別受歡迎！近年喺香港都有唔少台式吐司專賣店冒起，間間都足料抵食，而且好多間都係全日供應，睇下有無邊間啱心水喇。
原先位於旺角嘅超人氣台式外賣店，而家已經搬咗去葵廣同最近喺北角區開埋分店，但暫時得葵廣店先有吐司食～招牌台式肉蛋吐司加入美國大草原穀飼豬扒同半熟流心蛋，豬扒用秘製醬汁醃製，食落甜甜地帶鹹香又唔會蓋過肉味，配埋流心蛋汁真係好夾，想再邪惡啲可以加埋芝士呀～食得辣嘅朋友唔好錯過麻辣鬼椒肉蛋吐司，配料同肉蛋吐司基本上一樣，多咗一層麻辣醬汁，味道更豐富而且真心辣度十足。
圖: RheaChim
叁拾壹堂 (旺角)
一樣全天候供應台式早餐嘅餐廳，包括各式吐司同All Day Breakfast！吐司即叫即整好足料，好似招牌多層次蛋吐司同香茅豬扒蛋吐司都好有人氣，前者係烘過嘅麵包內夾住一層層煎蛋同薯仔醬，甜甜地，帶薯蓉沙沙地嘅口感，同雞蛋perfect match。另外餐廳仲不時推出啲新口味，如鹹蛋煎肉餅吐司等，將香港地道特色同台式風味融合埋一齊，呢款新吐司惹味又鹹香，重口味之選。
圖: IvywingyanNG、餐廳Facebook
uen cafeteria (太古)
又係一間由網店轉戰實體店成功嘅例子～餐廳座位唔多，裝修以木系作主調，加少量乾花作裝飾，好有台灣咖啡店風味。食物方面主打每日新鮮製成嘅芋泥吐司，最大特色係用料好捨得，芋泥足足有成吋咁厚，選用台灣當造芋頭加少量糖同牛奶打成，芋頭味好醇厚～除咗純芋泥仲可以配肉鬆、肉鬆芝士同紫薯等口味添！另外實體店供應埋鹹味吐司，好似軟殼蟹配蟹柳沙律吐司，軟殼蟹香脆唔油膩，配埋沙律即刻清新晒～
圖: trendytheory
初茶x山雞部 (土瓜灣)
係咪覺得個店名好有趣呢，因為呢間餐廳係由來自台中嘅小食店同茶飲店組成～食物方面主打台式便當、蛋餅同吐司，起司肉蛋綿吐司係必試之選，唔同坊間常見嘅肉排，反而加入一片片薄片嘅香煎五花肉，非常香口。五花肉以鹽同醬油等調味，惹味之餘又唔會太油膩，配埋蛋同芝士確係有驚喜。順便一提，佢哋嘅花雕雞腿塊 - 銷魂飯都係招牌之作， 雞肉香脆酒味好香濃㗎！
圖: amandasiuuu
文: Yanica