尖沙咀半島酒店食tea出晒名，其實上一層嘅露台餐廳buffet都唔錯，最近仲換上香港人最愛嘅海鮮主題，食lunch的話其實只需$498，部份食物款式比晚餐較少。晚餐就有埋波士頓龍蝦、蟹腳、蟹拑，但價錢就貴一截，想抵食定豪食適隨尊便。
自助餐食物貴精不貴多，雖然亦唔多live station，但食物精緻，而且由前菜同熱盤都新增咗唔少海鮮菜式，凍海鮮就有蟹腳、蟹拑、翡翠螺、帶子、熟蝦及青口等。
海鮮沙律有大蝦、芒果等配料，加埋食用花，賣相似a la carte菜式咁靚。日式刺身除咗大路嘅三文魚、吞拿魚外亦有貝類、甜蝦等。
即撈魚生poke有三文魚、吞拿魚魚生粒，加入醬油及麻油等，由師傅幫你即撈即食。另一款即叫即製的海鮮班戟，有白汁燉煮海鮮，再用薄薄的班戟皮包住，creamy又香滑。
冷盤必吃係原隻醬油煮鮑魚，炆得腍滑入味，不限隻數任你食。龍蝦芒果沙律有原隻開邊龍蝦，啖啖肉，加埋芒果肉及芒果汁好清新。
凍肉、壽司款式亦多，可以試到唔同味道及配搭。
熱盤方面，必吃晚市先有嘅香草牛油焗波士頓龍蝦，件頭大隻，肉質彈牙鮮味。另一款蒜蓉粉絲蒸扇貝亦相當厚肉，多汁香甜。西班牙海鮮飯亦係師傅重點推介。
即切carving station有兩款，新增嘅三文魚威靈頓無論係午餐或晚餐都有得食，酥皮外層包住三文魚、蘑菇碎，配上刁草白汁。
海鮮食唔夠喉，建議額外加錢散叫海鮮拼盤，$888一份睇落好貴，但有半打愛爾蘭生蠔、半打馬達加斯加熟蝦、4隻日本牡丹蝦、兩份北海道海膽，一隻南非龍蝦，份量足3至4人食！
海鮮以外其他食物亦有各式沙律、咖喱、中西熱盤等。甜品當然亦是半島拿手之作，蛋糕、朱古力精緻，亦有自家製雪糕，好滿足！
唔少酒店自助餐都已索價$600以上，呢度晚市收$808，但無分時段亦無限時，可以食足4小時。有特別節日或慶祝活動，不如豪一豪啦！而且有得網上訂位，夠方便！
地址：尖沙咀梳士巴利道22號香港半島酒店1樓
自助晚餐時間：18:00-22:00
價錢：星期一至日: 成人 $808 / 小童(3-11歲) $608
自助午餐時間: 12:00-14:30
價錢：
星期一至六: 成人 $498 / 小童(3-11歲) $398
星期日及公眾假期: 成人 $808 / 小童(3-12歲) $608
文、相、片：Perrins