以前細個，媽媽成日帶我哋周圍去玩，而家大個仔大個女後，輪到我哋帶返佢去威啦~ 趁住今個星期日母親節，同媽媽嚟個快閃香港半日遊，一齊打卡啦~ 行程同餐廳開飯仔都幫你諗好晒，港九新界都有。
九龍區: 油塘石礦場 + 三家村水產
唔好以為九龍巿區就冇咩地方好去，喺油塘站行幾個字，就有個無敵大海景兼宏偉石礦場，仲有啲荒廢小屋，打卡影相一流。一於帶埋媽媽去追趕最近好興嘅「廢攝」潮流啦！
圖：影完相行返出嚟，喺鯉魚門度食海鮮又得，又或者去食浜燒。三家村水產喺正海邊，嘆海鮮之餘仲可以繼續嘆海景。海鮮有嚟自日本嘅，亦有喺本地捕獲嘅，帆立貝、生蠔、白蜆、蟹等種類多多，又夠新鮮，一夜干都有呀！如果媽媽喺海鮮控就啱晒。
新界區: 下白泥 +喬木Arbor
可能你已經同朋友去過下白泥好多次，但有冇帶過媽媽嚟呢？呢個泥灘出名係睇日落嘅好地方，而且非常易去，落車行半個鐘左右就到，就算冇做開運動嘅媽媽應該都可以應付到。
圖：郊遊前後，可以去呢間以白色同木系為主嘅日系風格小店，喬木，係有啲日本feel嘅呢~~ 定食set相當豐富，有松葉蟹肉茶碗蒸、又有沙律、前菜、漬物、迷你烏冬、白飯、甜品等，一家人去日本旅行嘅感覺返晒嚟。主菜推介鹽燒油甘魚鮫，脆邊，肉嫩。
如果想帶媽媽去行個山，西高山絕對係一個好選擇呀，雖然路程主力係樓梯，但由山頂廣場出發，慢慢行半個鐘左右就輕鬆上頂。景觀開揚，喺度觀賞日落嘅CP值極高。
圖：睇日落之前，最好梗係食飽飽先啦，咁至有力行嘛。全店以粉紅色為主題嘅Camellia，仲有幢花花牆，完全可以一秒幫媽媽回復少女心，記得要幫媽媽影多幾張靚相呀。叫返set「永恒之愛」下午茶表達心意就冧晒，帶有淡淡伯爵茶香嘅忌廉泡芙，更係天鵝造型，夠晒別緻。
圖：落山後仲有力嘅，順便行埋山頂嘅Donki都得呀，有25個美食攤檔，無論係關東煮、章魚燒定係北海道牛奶刨冰等都有。
文、相：Kar
